حمو بيكا: أنا مش بيئة ولامجرم.. والهجوم عليا جابلي حالة نفسية

تحدث حمو بيكا، مطرب المهرجانات، عن مشكلته مع الموسيقار الكبير هاني مهنى، قائلًا: "هو شافني إني أنا بيئة ومجرم، ومفروض منشوفش بعض كدة، كلنا عايشين في بلد واحدة اسمها مصر، ويوم القيامة كلنا هنقف كلنا مستنيين في طابور واحد للمحاسبة، وأنا معرفش حضرته، بس بنته هي اللي بعتت لنا الدعوة، وطلعت عملت فيديو وقالت ده".

وأضاف "بيكا أنه في الفترة الأخيرة لم يصدر منه أي شئ خارج، والمصنفات الفنية حررت ضده محضرا بسبب فيديو الراقصة لودريانا، رغم أنها لم تظهر بأي ملابس خليعة، وهي فنانة استعراضية، معقبا: "بنشوف أفلام كتير فيها رقاصين، نروح نعمل محاضر ليهم، وكتر الهجوم عليا جابلي حالة نفسية وبقف قدام المراية أسأل نفسي، هو أنا بلطجي ولا إية، والناس في الشارع بتشوفني بشكل تاني، ومش عارف أحل المشكلة دي".

وأوضح مطرب المهرجانات في مداخلة مع برنامج "كلمة أخيرة"، المذاع على قناة "ON" الفضائية، وتقدمه الإعلامية لميس الحديدي: "هو عشان أنا معنديش ضهر، يطلع يتنمر عليا عادي، وأنا لما أعمل حاجة يبقى غلط وعيب!! أنا مش متعلم لكن بعرف حاجات كتير، وأهم حاجة إن مفيش حد فوق وحد تحت، وبلاش نتعامل مع بعض كدة، وكلنا ولاد تسعة وأولاد حوا وآدم".