رد ناري من المقاولون العرب على ”تفويت” عماد النحاس للأهلي
رد محمد أبو العلا محلل الأداء بالجهاز الفني لفريق المقاولون العرب، على الاتهامات بـ"تفويت"، عماد النحاس المدير الفني للأهلي وتعمد الخسارة في المباراة الأخيرة.
وكان الأهلي قد قلب تأخره بهدفين في الشوط الأول لفوز بثلاثية، في المباراة التي جمعت الفريقن ضمن منافسات الجولة التاسعة من بطولة الدوري.
وكتب أبو العلا عبر حسابه الرسمي على موقع التواصل الاجتماعي "فيسبوك": "لا بس عماد النحاس مفوت الماتش على أساس أن المقاولون قبل عماد النحاس كان بيكسب أي ماتش مع الأهلي 3/0 مثلا وبقي يخسر دلوقتي، طيب وحاجه تانية هو الزمالك لما بيخسر كتير من الأهلي كل المدربين اللي بتبقي ماسكة وقتها كانو مفوتين بردو".
وتابع: "طيب أسمع وأفهم أي مدرب أيًا كانت انتمائاته مش عايز يكسب ويعمل تاريخ لاسمه ولشغله بجد الموضوع بقي مخزي وفج، وخودها مني بقي بالضمان مفيش مدرب في مصر ينفع يجي في تفكيره بس إنه يخسر قصد من أي فريق هو بيشجعه، عشان ببساطه أي مدرب أهلاوي نفسه يمسك الأهلي وأي مدرب زمالكاوي نفسه يمسك الزمالك وإنك تتعامل كويس وتعمل نتايج إيجابيه مع فرق كبيره زي الأهلي والزمالك وتكسبهم دي بتقربك أكتر لحلمك".
وواصل: "يبقي استحاله إنه يبقي في قاموس حياته إنه يفكر كده، فنصيحة ارتقوا بالتفكير قبل الكلام علي أي حد، لو شوفتوا حالة كابتن عماد بعد الماتش إنه خسر بعد مكان كسبان 2 والله والله والله ما في حد يفكر في غير إنه كان نفسه يكسب الأهلي".
وتابع: "والله ما كان مضايق كده لما خسرنا من الزمالك، أنا بحلف وشهادة قدام ربنا علي فكره واللي يعرفني عارف إني زمالكاوي ونفس الفكرة، وإحنا بنلاعب الزمالك أنا ببقي نفسي نكسب الزمالك جدًا عشان ده شغلي وده ضمير وأمانه وأكل عيشي ولازم أراعي ربنا فيه وهتحاسب علي ده".
اقرأ أيضًا: عماد النحاس: ”لاعيبة المقاولون مكنوش مصدقين الفوز على الأهلي”
واختتم: "لو خسرت من الزمالك مش هستفاد حاجة محدش هيجي يقولي خد مكافاءة الماتش اللي بشتغل عشانها لما أخسر أنا قاصد، بجد أنا زعلان جدا والله من الي بشوفه، نختلف فنيًا ده مقبول غير كده مش مقبول بالمرة".
