حمادة هلال يكشف صعوبات بدايته: أقسمت ما اشتغل تاني.. واتضربت على قفايا (فيديو)

تصدر اسم الفنان حمادة هلال تريند قائمة منصة جوجل بعد استضافته في برنامج "صاحبة السعادة" تقديم الإعلامية والفنانة إسعاد يونس، حيث كشف عن العديد من الأسرار في حياته الفنية والصعوبات الشديدة التي واجهته قبل دخوله مجال الغناء.

وقال حمادة هلال إن أسرته من الشرقية، لكنهم تركوها بعد فترة وانتقلوا للعيش في منطقة الزاوية الحمراء التي ولد وعاش فيها، مضيفًا:"ماكنش في دماغي قصة الغناء بس كنت دايما أغني وأسجل لنفسي، لحد ما في يوم خالي خد باله من صوتي وقال الواد ده صوته حلو، وهو كمان كان نفسه يكون نجم وحاول كتير وفي الآخر كان بيطلع كومبارس، بس قال لي ربنا هيكرمك".

حمادة هلال يكشف عن أول مرة غنى فيها في أحد الأفراح الشعبية

وعن أول تجاربه في الغناء قال إن صديقه الشاعر هادي أبواليزيد الذي كتب لي أغنية "مسطول" وأغنية "ناس عيشتها ارتاحت"، هو من ساعده للغناء أول مرة في أحد الأفراح الشعبية بالشارع، مضيفًا: "كان بيطلب من نبطشي الفرح إني أغني، راح ضربه في وشه برجله ونزف دم، لكن كان مصمم إنه يخليني أغني لحد ما وافق".

واستكمل حمادة هلال حديثه خلال لقائه مع إسعاد يونس، حيث قال: "طلعت على المسرح وغنيت أول أغنية في حياتي "بابا يا بابا يا أعز الحبايب"، كان عندي 8 سنين، والفرح كان تحت البيت عندنا، وأبويا سمع صوتي، وغنيتها 15 مرة، وفي المرة الأخيرة لقيت جالي قفا من خلفي وطلع بابا في الآخر".

وواصل:"لما بفتكر بقول الله يعينك يا بابا، وبعد الفرح أبويا بقى يراقبني جامد، لحد ما في راجل بلطجي اسمه محمد الخواجة، لما شافني بغني في الفرح أخدني معاه الأفراح ولما كنت أغني على المسرح كان الناس بينقطوني فالنقطة تيجي كتير وياخدها مني ومعرفهم أنه أبويا وبقى اسمي حمادة الخواجة".

وأضاف: "وبعد فترة لقيت الناس بيسألوا أبويا ده ابنك ولا ابن محمد الخواجة، وأبويا كان بينام بدري وكنت بنزل من وراهم، فركز معايا ولما نزلت راقبني ونزل ورايا وأول ما غنيت دخل ضرب محمد الخواجة وقال للناس ده ابني بصوت عالي وحرقة، وفي اللحظة دي حسيت بحزن وكسرة أبويا وأقسمت بالله ماشتغل تاني".

المنتجين كسروني

وتابع: "زمايل والدي في الشغل نصحوه إنه يوديني للمنتجين مضيفا:"كنت بخرج من عند المنتجين بكسرة خاطر، كانوا صعبين جدا وقتها وفي كل مرة كانوا بيكسروني كسرة مش هنساها لدرجة إني كرهت المنتجين كلهم فأخدت قرار ماشتغلش وكرهت المنتجين، لإن الطفل إحساسه أعلى من الكبير، وأكتر واحد تطيب بخاطره".

اقرأ أيضًا: أحمد الفيشاوي لـ محمد رمضان: الحرب ابتدت وخلي جمهورك يشتمني (فيديو)

واستكمل: "بعدها قررت إني هترك موضوع الغناء وفقدت الأمل، لحد ما في واحد أعرفه قال لي هوديك لحميد الشاعري، وكنت شاكك في كلامه لإني في الفترة دي كنت فقدت الثقة في الجميع، ورحت لحميد الشاعري ووداني لطارق عبد الله في شركة هاي كواليتي وماكنتش مصدق"، مختتمًا:"الواحد أحيانًا بيمر بمواقف وأزمات تقيلة علشان لما يفرح يحس بطعم الفرح".