”أرجع يا أحمد”.. فنانة شهيرة تترجى أحمد السعدني للتراجع عن انسحابه من ”كله بالحب”
حرصت الفنانة سلوى محمد علي أن توجه رسالة للفنان أحمد السعدني بعد خلافاته مع الفنانة زينة وانسحابه من مسلسلها الرمضاني "كله بالحب".
ووجهت رسالة لأحمد السعدني عبر صفحتها الشخصية بموقع التواصل الاجتماعي "فيسبوك"، وكتبت: "ارجع يا أحمد المسلسل مش شخص واحد، المسلسل عشرات الفنانين والفنيين اللي وقتهم وجهدهم لا يقدر.. ولا أي تتر يساوى عطلة زمايلك".
وتابعت: "ارجع يا أحمد ده مسلسل بيتعرض الجمهور له حق علينا نخلص اللي بدأناه ولو ليك حق خده بعد الشغل مش في وسط الشغل.. وعارف التتر اللي مزعلك ده بيتشال بعد أول أسبوع هتخلص المشاكل ويبقى العمل الفني شاهد على الحقوق".
ويشار إلى أن الفنان أحمد السعدني أعلن قبل ساعات انسحابه عن استكمال تصوير مسلسل "كله بالحب" الذي يشارك به الفنانة زينة ضمن السباق الرمضاني الحالي.
وكتب السعدني أمس الاثنين قبل بدء الحلقة الأولى عبر صفحته الرسمية بموقع فيسبوك قائلًا: "أعلن بشكل رسمي انسحابي من المسلسل المهزلة.. تقدمي بشكوى رسمية للنقيب الدكتور أشرف ذكي ضد شركة الإنتاج للخرق الواضح للعقد الموقع مع الشركة".
وتابع: "متمسكًا بكافة حقوقي المادية وآسف للإزعاج مرة أخرى ورمضان كريم"، وكان قبلها كشف حقيقة الخلاف وكتب: "بسم الله الرحمن الرحيم، الحقيقة أنا عمري ما عملت مشكلة في شغلي وعمري ما اختلفت مع زمايلي إنما أنا اللي بيحصل معايا في المسلسل اللي شغال فيه ٢٤ ساعة مبروحش بيتنا عشان يلحق العرض والواحد ساكت".
وأضاف: "وبيعدي بلاوي عشان الزنقة والظروف، أنا متربي في ستوديوهات كبرنا أنا واللي زيي اللي كان بيتقال عليهم أبناء الفنانين كأنها شتيمة على احترام مهنتنا مواعيدنا ومذاكرتنا وتحضيرنا للشغل.. احترامنا للكلمة قبل العقد للأسف شركة الإنتاج ملتزمتش معايا باتفاقهم اللي على أساسه وافقت اشتغل وكان شرط أساسي لقبولي الشغل معاهم والحقيقة أول مرة أشوف تصميم دعايا عمل فني من أفيشات وبرومو بتعمله زميله في العمل".
اقرأ أيضًا: الحلقة الأولى | ”بين السما والأرض”.. تحية خاصة لـ بليغ حمدي.. وهاني سلامة وراء تعطل المصعد
وتابع كلامه: "طول عمري كنت فاكرها من اختصاص شركة الإنتاج.. الحقيقة أنا ضهري في الحيط أكمل وأقبل بالعبث ده عشان باقي الزملاء الفنانين والفنيين المشاركين في العمل اللي ملهمش ذنب ولا أقعد في بيتنا واكتفي باللي صورته واطلب من النقابة تجيبلي حقوقي المادية، وفي كل الأحوال أنا بعتذر لأي شخص بيحبني عن تواجدي في هذا العمل لأن الحقيقة اللي بيحصل ده مهزلة".
