”ماتت صائمة وطفلتها كشفت المستور”.. ماذا حدث في جريمة ”شقة بولاق”؟
"ألو يا مصطفى إنجي أختك شنقت نفسها تعالى شوفها".. جملة قاسية نزلت كالصاعقة على صدر شقيق الضحية، بعد أن سمع مكالمة هاتفية لم تستمر سوى ثوان معدودة، حتى هرول في الشارع أملا في إنقاذ بشقيقته.
لحظات قليلة وصعد صاحب الـ 17عاماً لشقة شقيقته ولكنه فوجئ بمنظرها وهي مسجاه علي الأرض ومكبلة القدمين بإيشارب كانت ترتديه، وأخبر جميع أسرته بأن الزوج "أدهم" وراء تلك الجريمة.
داخل حارة ضيقة يعمها الهدوء تماماً بعد منتصف الليل، قطع صوت صراخ وعويل النساء حالة الصمت، إعلانا بوقوع جريمة قتل بشعة حدثت داخل شارع على عبد الله المجاور لسوق كفر طهرمس المزدحم، "أدهم قتل بنتنا قدام بناتها".
اقرأ أيضا: ناجون من حادث الموت بطوخ يروون لحظات الألم: ”القطر اتقلب والناس اتعجنت في بعض”
منظر مرعب وقاسي جداً كان أمام جميع أسرة الضحية، لم يتحمله البعض منهم: "بنتنا كانت مخنوقة وحولين رقبتها أسود داكن، زى ما يكون مقطعها بسكين مش خانقها بحبل".
"لقيت بنت أخويا ميتة والفطارعلى الطبيلة، إنجي ماتت هي وصايمة".. كلمات ثقال بدأ بها عم الضحية" يروي لنا تفاصيل الواقعة المأساوية التي حلت قبل فجر يوم الخامس من رمضان، "أنا مش مصدق أنه عمل فيها كده إزاي اتجرأ وعمل كده في مراته اللي المفروض يصونها ويحافظ عليها".
وأضاف العم أن "الزوج كان في حالة غريبة جداً، أنا أول مرة أشوفه كده من ساعة ما اتجوزها"، في الوقت الذي دلل الزوج على ارتكاب الجريمة "أنا لسه صاحي من النوم، ولقيت مراتي مشنوقة في ماسورة الغاز".
يقطع شقيق الضحية كلام عمه بصوت بدت عليه علامات الكسرة والحزن: "أول ما دخلت عليه وقلتله ليه بتعمل كده في أختى، رد عليا وقالي أنا رنيت عليك وأنت مردتش الساعة 9 بليل عشان أقولك، وكان بيشرب سجاير وكأنه معملش حاجة ولا قتل أختى".
ويضيف والد الضحية بدموع غالبت عيناه: "كنا رايحين نتسحر واتصل بينا مصطفى ابنى قالنا أدهم قتل إنجى"، وأنا وأمها جرينا مش عارفين نعمل اى ولا نروح فين، روحنا الشقة ولما رايحين ننقلها على المستشفى رد جوزها "لا لا هى ميته من بدري".
ويتابع الأب المكلوم: "بنتى كانت معلقة زينة رمضان في الشقة إزاى وحدة صايمة هتعلق نفسها في ماسورة الغاز!، وهو اللي قتلها عشان الـ1000 جنيه اللي ادهتولها تصرف منه في رمضان هى وعيالها، ولما المباحث جات فتشته لقيوه الفلوس في جيبه".
واستطرد الأب: "أنا كنت عازم بنتى على الفطار يوم الخميس، وهو زعق معاها في بيتى وقالها قومى هاتى 20 جنيه من أمك أجيب علبه سجاير، وكان كل ما أديها فلوس يضربها وياخدها منها ويروح يشتري بيها سجاير ومخدرات".
يصمت عم الضحية قليلا ويسترجع ذكريات الحادث: "بنته ملك اللي عندها 3 سنوات هى اللي كشفت سر القضية واعترفت قدام النيابة "بابا قتل ماما وعلقها في ماسورة الغاز، وقبل ما يقتلها اتخانق معاها شد منها التليفون ورماه فوق الدولاب عشان ما تتصلش بجدو يجي".
اقرأ أيضا: ”الميت أبقى من الحي”.. شاب يقتل شقيقه بسبب رفضه تقديم واجب العزاء
يقطع شقيق الضحية كلام والده:" أم الجانى رشت على أختى ماية بعد ما قتلوها، وكانت بتقول قدامنا قومى يا إنجى دا شكلها عندها غيبوية وهتفوق منها".
الأم
"كانت بتقولى يا أمى بيضربنى وبياخد الفلوس منى، وكانت رافضة الطلاق منه وبتقولى عايز اعيش واربى عيالى"..جمل مؤلمة قالتها والد "انجي"، بنبرة حزينة وبكاء مستمر تقول الأم "كانت بتقولي جوزى عايز فلوس وهو بيشتغل يوم وباقى الشهر نايم في الشقة".
وطالبت أسرة الضحية بتوقيع أقصى عقوبة على الجانى: "إحنا طالبين من الله العوض والصبر والقضاء العادلة اللي يطفى نارنا على بنتنا"، مرددين" بنتنا ما انتحرتش هو وأمه قتلوها وعايزين يخرجوا منها".
