ستات ولا دبابات؟

الست المصرية بقت عاملة زى الدبابة كدا ليه؟.. بقت بتتخن بالعرض (سمنة مفرطة). والسمنة دى مصحوبة بشوية امراض، منها السكر والضغط، ومصاريف العلاج زادت هى الاخرى، علشان كده الراجل بيفكر دايما يتجوز تانى مادام شايف مراته دبة ادامه، وحتى لو اتجوز بدل ما يبقى عنده دبة واحدة يبقى عنده اتنين.

تعالوا نبحث المشكلة من جذورها، الست كانت زمان بتصحى من الفجر تفضل واقفة لحد ما الكل يخرج على شغله، وبعدين تروح هى على شغلها، إن كانت فلاحة على الغيط، موظفة على شغلها، علشان كده مكنش عندها جرام شحم فى جسمها وصحتها حديد.

البنت تبقى لسه متجوزة وبعد شهر تلاقيها دبابة، مكنتش تلاقى ست فيها جرام دهون، هيكون عندها دهون ليه؟ وهى مبتهمدش طول النهار، وكانت بتنام ساعات بسيطة، دلوقتى بتنام طول الوقت.

فى أجهزة حديثة دخلت فى حياة الستات دمرتها، أولها الغسالة، الست يوم الغسيل كانت بتبذل مجهودا خارقا، دلوقتى الغسالة بتعمل كل حاجة، الفرن يوم الخبيز، الست كانت تقوم من الفجر متنمش غير بالليل، دلوقتى العيش بيجيلها سخن كل يوم وإن حبت تخبز فى البيت هتخبز على فرن مريح جدا. الملح (الدقة) الست كانت زمان بتدقها فى الصلايا طول النهار واقفة تدق، دلوقتى الخلاط فى ثوانى.

المية كانت تحولها طول النهار لما تملى الزير، دلوقتى تفتح الحنفية، بس كل المجهود دا كان بيدوب الدهون.

علشان كده كنت تلاقى الستات بتولد طبيعى، تلاقى فى الكويت ودول الخليج يدوروا على الست اللى بتعمل كل حاجة بايدها، مش اللى بتركب وخلاص، ودول موجودين فى البلاد المتخلفة زى افغانستان وبنجلاديش والصومال والسودان.

الكهربة نورت، زمان كانت الست تتعب على ما تولع لمبة الجاز. فى نفس الوقت الدخل زاد وانعكس على الطعام والشراب.

الوجبات الجاهزة كتير بيشتريها، دى سبب رئيسى فى السمنة المفرطة اللى فيها الستات، فالست بقت تاكل أكل صحى بدون ما تبذل أى مجهود، فكان لازم تتخن.

فى دول الخليج المشكلة دى موجودة عند الراجل كمان علشان معدش بيبذل ادنى مجهود فجسمه ضرب هو الآخر، فى أوروبا والدول المتقدمة تنبهوا لخطورة هذه المشكلة، عملوا نوادى وأماكن لممارسة الرياضة علشان الست ماتضربش وتفضل رشيقة، ودا مش موجود فى الدول النامية، حتى عمليات ازالة الدهون هناك مش غالية زى هنا، تكميم المعدة 100 ألف جنيه.

التكنولوجيا الحديثة كان لها أثر سيئ على المرأة العربية بوجه عام، لكن فى الدول المتحضرة التكنولوجيا لم تضر.