”عيب ومهانة”.. دعاء فاروق تكشف عن استيائها من قرار إحدى مدارس الثانوية العامة
أعربت الإعلامية دعاء فاروق، عن استيائها الشديد من قرار إحدى المدارس بشأن تسليم استمارة الثانوية العامة حيث اشترطت إدارة المدرسة أن يقدمه الأب أو الطالب ولا يجوز تسليمه من الأم.
ونشرت دعاء فاروق البيان الصادر عبر حسابها الخاص بموقع "إنستجرام"، وعلقت عليه كاتبة: "طيب اديني بحط القرار على الصفحة وعلى الملأ اسجل اعتراضي بشدة علي هذه المهانة والإهانة... الناس اتشنجت عشان أنا جبت سيرة مدرستهم وقالولي ده قرار من وزارة التربية والتعليم... طيب القرار أيا كان طالع منين... ده قرار مهين انتو بتهينوا الأمهات وبتجرحوهم كده".
أضافت: "مبدئيا الولد أو البنت في الثانوية العامة كبار كفاية إنهم يجيبوا شهادتهم بنفسهم.. طيب لو حصل أي ظرف للولد أو البنت والأب كان مسافر أو متوفي أو الطالب مالوش غير أمه يعملوا إيه بقى؟؟ وإيه لازمة هذه القرارات المهينة للأمهات الشقيانين التعبانين والمتمرمطين عشان عيالهم يا وزارة التربية والتعليم؟؟ أو يا مدرسة س أو ص هي الأم هتاخد الشهادة تحطها في القايمة مثلا؟؟ هترفع بيها قضية على الأب لمؤاخذة؟؟؟ هتقايض بيها حد؟؟؟ إيه قلة القيمة دى؟؟؟".
وتابعت: "مبدئيا كده إحنا في زمن تخلي فيه كثير من الأبهات عن مسؤولية أولادهم وبيطلقوا الأم والعيال ومبيسألوش عنهم... أنا شخصيا أعرف بنت أبوها مطلق أمها كل ما تكلمه يقولها أنا معنديش بنات الحمد لله إنها تدرس في نظام غير نظام الثانوية العامة اللي بيهين أمها وبيطردها من جنة استلام الشهادة وكاتب القرار بالبونط العريض كمان وقال حاطط تحته خط .. يا حزن الحزن أنا في قمة الغضب وقمة الحسرة علي مباديء وقيم بنحاول نعلمها للناس وياما قلنا بلاش تعملوا عداوات وتحطوا الأولاد بينكم وسيلة للضغط".
اقرأ أيضًا: حقيقة اعتزال حسين الجسمي بعد تعرضه للتنمر والسخرية ورد سوزان نجم الدين
وواصلت: "لازم احترام الطرفين لبعض عشان فيه أولاد حتى لو حصل طلاق .. وتيجي قرارات رسمية تطيح بكل هذه المبادئ وقرارات تعزز مسألة الضغط علي طرف دون الآخر وقرارات تهين الأم ولا تحترمها وتضعها في خانة اشبه بخانة الحرامية اللي لا يجوز تسليمهم شيء لا يخصهم... والله العظيم عيب".
