”أبوس إيديكم اتقوا شر الألم”.. رسالة نشوى مصطفى للمواطنين بعد شفائها من كورونا

تحدثت الفنانة نشوى مصطفى إلى الشعب المصري بعد شفائها من فيروس كورونا المستجد، موجهة نصائح للمواطنين لتفادي الإصابة بالوباء.

وقالت "نشوى" في مداخلة هاتفية إلى برنامج "كلمة أخيرة" الذي تقدمه على قناة "ON"، مساء اليوم السبت: "أبوس إيديكم لو بتحبوا ربنا وبتحبوا ولادكم اتقوا شر الألم اللي أنا حسيت بيه، حافظوا على نفسكم علشان ولادكم وأكل عيشكم كلنا على باب الله".

وأضافت الفنانة المتعافية: "كلنا على باب الله وماشيين بالأرزاق عشان أكل عيش ولادكم مش هينفع لو إنت عامل أو صنايعي ترقد، حافظ على نفسك أرجوك بالكمامة، كمامة تمنها 3 جنيه هتحافظ عليكم وهتخليك لبيتك وأولادك".

وتابعت: "أنا كان معايا فلوس بس مافيش مستشفى كانت عاوزة تقبلني من المستشفيات الخاصة لكن مستشفى بلدي العامة الحكومية قبلتني أنا عندي فلوس وربنا ساترني بس مكنتش بقدر أحط في بقي لقمة، الفلوس مش مهمة لما تبقى معاكي ومفيش مستشفى راضية تقبلك أو قادرة تاكلي حتى، الصحة يا جماعة أهم من أي حاجة في الدنيا، والنبي ماتستهونوا، كورونا دي صعبة جدًا أصعب من ألم الولادة".

وواصلت: "أنا أهملت واتكسفت من لبس الكمامة وماتسلموش على حد بإيديكم وحافظوا على التهوية والتباعد والتغذية، كلوا برتقانة وحزمة جرجير أو جوافة وحتة جبنة قريش دي نصايح الدكتور حافظوا عليها عندنا الحاجات دي رخيصة، إحموا نفسكم مع الكمامة".