بطلة قصة فقدان الأجنة تحكي تفاصيل ”الكابوس”.. والشيخ أحمد كريمة يكشف حقيقة تسبب الجن في الواقعة (فيديو)

كشفت ولاء عبد الناصر بطلة واقعة فقدان جنينها التوأم بعد كابوس شاهدته أثناء نومها، عن تفاصيل الواقعة كاملة خلال مداخلة هاتفية مع برنامج "التاسعة" الذي يقدمه الإعلامي وائل الإبراشي على القناة الفضائية المصرية.

وبدأت ولاء عبد الناصر حديثها قائلًة: "والله والله أنا أولًا أي كلمة هتكلمها مش كذابة فيها، أنا فعلًا كنت حامل وكنت بروح للدكتور وبشوف الجنين فى الأشعة، وأنا مش عارفه إيه اللي حصل معايا".

وتابعت: "أنا حصل وشوفت الطفلين التوأم اللي أنا حامل فيهم فى الأشعة، وأخدوها مني الدكاترة فى المستشفي هى والتحاليل والروشتات ومأخدتهاش تاني".

وأضافت ولاء عبدالناصر قائلًة: "أنا كنت قاعدة وصاحية وحاجة دخلت جسمي ساقعة ومحستش بنفسي ودخلت الأوضة لما حسيت بالسقعة وحسيت زي ما يكون فيه خوف داخل عليا ودخلت الأوضة التانية اللي فيها جوزي ولسه كنت هنام وهغمض عيني لقيت ست طويلة وعريضة وسمرا داخلة عليا وبتقولي أنا هولدك ودول عيالي مش عيالك انتي، وبعد كده محستش بنفسي وعايزة أتكلم مش قادرة وعايزة أصرخ مش عارفة وأنا مش عارفة إيه دي وعايزة حد يفسر لي ده".

وأوضحت: "الست دي جاتلي فى نفس الشهر ده 3 مرات وكانت أول مرة واخداني فى مستشفى ولابسة البالطو الأخضر وحاطة لي كانولة فى ايدي وبتقولي انتي داخلة تولدي وكنت أصحي بعد كده، والمرة التانية نفس الكلام والمرة التالتة حصل نفس الموقف وقالت لي انتي قربتي تولدى".

وأضافت: "أنا كنت بسأل الناس وصحابي قالولي لا علشان إنتي قربتي على الولادة بيحصل معاكي كده، ومأخدتش فى بالي لحد ما فجأة حصل اللي حصل".

وتحدثت السيدة عن اليوم الذي اكتشفت فيه فقدان جنينها: "فجأة اَخر مرة دي لقيت الست دخلت معايا ورفعت رجلي لحد رقبتي وايد مسكت بيها رقبتي والايد التانية دخلتها ببطني وحسيت وقتها روحي بتطلع، والله والله حسيت روحي بتطلع، وجوزي حس بيا وأنا على السرير ولما فوقت قالي أنا كنت بحاول أفوقك مش عارف، لكن أنا محستش بيه غير لما هي خلصت ومشيت وكانت حاطة حاجة على صدرها مشوفتش إيه هو ده، ولما فوقت لقيت جوزي بيفوق فيا ويقولي مالك مالك؟ وبقيت أقوله عيالي عيالي، وبطني اللي كانت قدامي ملقتهاش لقيتها اختفت".

وأشارت الأم المختفي من بطنها التوأم قائلًة: "والله أنا ما كنت حاطة الحكاية فى دماغي ولكن لما اتشهرت على الفيسبوك ناس كتير علقت وقالت ان ده حصل معاها نفس الكلام".

اقرأ أيضًا: أغرب من الخيال.. مصرية حامل فى توأم تستيقظ بعد كابوس وتكتشف اختفاء الأجنة من بطنها (فيديو)

الشيخ أحمد كريمة يرد على السيدة التي أثارت الجدل بإختفاء الجنين من داخل رحمها

ومن جانبه، قال الشيخ أحمد كريمة أستاذ الفقه المقارن بجامعة الأزهر الشريف، إنه هناك مسألتان نتحاكم فيهما إلى الشريعة الإسلامية، والمسألة الأولي فى الفقه الإسلامي هى تخصصي فى الجامعة، وهى "هل الجن يسببون أمراضًا لبني اَدم"، قال الفقهاء فيها أن "الأمراض الحسية والنفسية لبني اَدم لها أسبابها التى يعرفها الأطباء فى تخصصاتهم"، وقد كفل الله سبحانه وتعالي بحفظ الناس من مكائد العتاة من الشياطين والمردة.

وأضاف كريمة، أن الَاية 11 من سورة الرعد توضح أن هناك ملك من الملائكة مهمته حراسة الأرحام وحفظ البني اَدم من مكائد الجن، مشيرًا إلى أن مذهب أهل العلم أنه محال أن يدخل الجن جسد الانسان، ولأدى ذلك الى اجتماع جوهرين فى حيز واحد وهذا الأمر محال.

وتابع: "أن الملك موكل بالرحم وحفظه، وإذا قربت ولادة الجنين، أمره الله سبحانه وتعالي أن يكتب أربعة أشياء وهى "عمره ورزقه وحظه "شقي أو سعيد" وأن يكتب رزقه".

وتسائل، "إذا كان هناك ملك موكل بالأرحام لحراستها، وإذا كانت هناك ملائكة ربنا جعلها حراسة وحماية للجنس البشري اللي ربنا فضله على جميع المخلوقات "ولقد كرمنا بني اَدم وحملناهم فى البر والبحر ورزقناهم من الطيبات وفضلناهم على كثير ممن خلقنا تفضيلًا"، فكيف لجن أن يأتى ليدخل ويأخذ جنين من بدن الإنسان والرحم".

واختتم أستاذ الفقه المقارن بجامعة الأزهر الشريف، أن التفسير المنطقي لهذه الواقعة هو جواز أن يكون هناك خطئًا فى الأشعة التى أُجريت لها وأن المعامل ممتلئة بالأخطاء.