مؤمن زكريا يتحدث عن زيارة الخطيب ويكشف سبب طريقة احتفاله بالأهداف
أكد مؤمن زكريا، لاعب النادي الأهلي على أن مرضه اختبار قوي من ربنا، مضيفًا الحمد لله مستحمل، وربنا ما يكتب الاختبار ده على حد".
وقال مؤمن زكريا في حواره للإعلامي يعقوب السعدي عبر قناة "الأهلي": "أفضل اللحظات في حياتي هي لحظة تواجد جمهور الأهلي إللي جت لي تحت البيت".
وأضاف: "أشكر محمود الخطيب رئيس الأهلي على زيارته لي في منزلي، ده شيء كبير جدًا بالنسبة لي، وعلى راسي".
اقرأ أيضًا: علي معلول: الخطيب أسطورة ويعرف متى يرد على مهاجميه
وتابع: "بأحمد ربنا على محنتي، ومرضي، وصابر، ومستحمل، وربنا ما يكتبه على حد، مرضي ده شوية برد وهيروجوا".
وأكمل: "الأهلي ما سبناش، ونحمد ربنا على كل حال، طول عمري بأشجع الأهلي، علاقتي بالأهلي عمر كبير، والحج هو إللي زرع فيا حب الأهلي، وهو مشجع للأهلي من زمان".
واستطرد: "النادي الأهلي مش رياضة بس، الأهلي تعليم وأسس، وحياة، ومبادئ، وطموحات، بيعلمك يعني إيه حياة".
وتابع: "الحركة إللي باحتفل بيها بوضع إيدي على أذني دي يعني مش سامع حاجة، عملتها أول ما روحت الأهلي، ودي رسالة بأوجهها لبعض الجماهير إللي قالوا إني مش هأعمل حاجة لما أروح الأهلي بعد ما مشيت من الزمالك، والحمد لله جبت هدفين في أول مباراة قمة في مرمى الزمالك".
وأكمل: "بأقول للعيبة الأهلي شكرًا، كلهم كانوا واقفين جنبي بإخلاص وحب، أنا واحد من عيلة النادي الأهلي".
واستطرد: "جمهور الأهلي لو قعدت أتكلم قد إيه مش هأقدر أوفيه حقه، أنا مصاب بقالي أكتر من سنة ونص، وهما محسسني إني دايمًا في الملعب مش بعيد، مش هأقدر أوفيهم حقهم".
واختتم: "الكابتن محمود الخطيب هو إللي حجزلي في المستشقى بألمانيا، اللي عمل فيها عمليته".
