أيمن بهجت عن خلافه مع أبو الليف: خسرنا تعاقد مش هنقدر نعوضه.. ومرتضى منصور وقف جنبنا
كشف المؤلف أيمن بهجت قمر عن تفاصيل خلافه مع خاله الفنان نادر أبو الليف، الذي أكد أنه كان لا يريد الحديث في هذا الأمر منذ سبع سنوات، ولكنه قرر أن يكشف التفاصيل خاصة لاتهامات أبو الليف له لتقصيره معه في العمل.
وكتب أيمن في منشور له عبر حسابه الخاص بموقع "فيسبوك": "في موضوع متعلق من سبع سنين أنا ما اتكلمتش فيه، بس واضح إن الفنان نادر أبو الليف اللي بتجمعني بيه صلة قرابة، مصمم إنه يخليني أتكلم وأنا هتكلم بالأصول واحتراما لصلة القرابة، أكتر من مرة نادر طلع بيلمح إننا قصرنا معاه أو حاجات من هذا القبيل وآخرهم الأسبوع ده، وبما إنه كلام يخص العمل مش عن العلاقات الشخصية فاعتقد التوضيح ممكن يكون مهم عشان نقفل الصفحة دي وكلامي كله عليه شهود موجودين من زملاء ومن أقارب كمان من الدرجة الأولى".
وتابع "قمر" في منشوره: "في 2009 لما اشتغلنا أنا وتوما والملحن محمد يحيى وقدمنا أول ألبوم لأبو الليف من إنتاجنا، إحنا ما استخسرناش أي حاجة معاه وعملنا ألبوم كسر الدنيا، واللي حضراتكم ماتعرفهوش إننا لما تعاقدنا مع إحدى شركات الإنتاج، اتفقنا أنا ويحيى وتوما على إن المبلغ اللي هتدفعه الشركة هنقسمه على أربعه ومافكرناش إننا أسماء ونادر صوت جديد، وبعد ما نحسب مثلا التكلفة الفعلية الكبيرة للألبوم، يعنى احنا كنا جدعان معاه وأوى كمان، وكنا كمنتجين بناخد نسبه إحنا التلاتة 10 في المية لكل واحد، يعني لو أبو الليف طلع فرح كان بيطلع لى 300 جنيه".
واصل الشاعر الغنائي أيمن بهجت قمر: "المهم، حصلت مشاكل والشركة كانت بتقفل وحصل بينا وبينهم مشاكل وقضايا، وكان أبو الليف هيتوقف، لجأنا للمستشار مرتضى منصور اللي وقف جنبنا وقتها بلا مقابل بسبب تعاطفه معانا، وبسبب تاني إن أمير مرتضى كان عايز يخدمني ويستجدع معايا كعادته، وبالفعل نجحنا اننا نتعاقد مع شركة نجوم ريكوردز ومضينا معاهم، وتاني قسمنا مبلغ التعاقد على أربعه برغم اني كنت بطلع خسران كل ألبوم، ومابكملش أجرى كشاعر في الأغاني بس كان حماسي طاغي للتجربة، نزل الألبوم وقت نجاح الإخوان وماعملش جو، وابتدت البلد تدخل في ظروف صعبة".
واستكمل بهجت موضحًا أن أبو الليف تسبب في خلافات مع شركة نجوم ريكوردز وطلب فسخ العقد معها:" وفي وقت الاعلان الدستوري لمرسى والبلد فى مظاهرات وواقفة، ابتدى نادر يضغط، هو أنا ليه مش بنزل حفلات؟ فين الكليبات؟ فين الأفراح؟ مع إن الشعب كان قاعد عند الاتحادية والتحرير وقتها، هو نجح في وقت صعب.. فضل يضغط وراح باعت رسالة لكريم الحميدي اللي كان مسؤول وقتها فى نجوم ريكوردز وكريم موجود وكانت رسالة مش لطيفة، وطلب وقتها فسخ التعاقد معانا ومع نجوم ريكوردز، وأنا وقتها انصدمت، افسخ مع نجوم ريكوردز.. مع توما.. مع يحيى.. بس مش معايا أنا، المهم عاملناه بمنتهى الاحترام والرقي أنا ويحيى وتوما وفسخنا بالحسنى".
وواصل المؤلف ايمن بهجت قمر أن أبو الليف تسبب في خسراتهم لتعاقد مع نجوم ريكوردز من المستحيل تعويضه:" وكالعادة نجوم ريكوردز محترمين، أيمن سالم ومدام هاله حجازي واتنازلوا عن الشرط الجزائى وخسرنا تعاقد محترم جدا عمرنا ما هنعرف نعوض ربعه النهاردة، كان فيه حسابات بينا قولنا في بيتها وحبيبنا واخونا وادينا له كامل حريته".
وأردف: "بالرغم انه كان بيشتكى أيام الإعلان الدستوري إن نوعية الأغاني اللي بكتبهاله مش بتأكله عيش، زائد اننا متفقين معاه مافيش شارع الهرم من البداية، جه قال أنا عايز أغني شعبي صرف، وده ماكانش اتفاقنا، اتفاجئنا وأول ما سابنا إنه راح عمل أغنية اسمها كينج كونج 2، مع أخويا الشاعر هشام صادق، وطبعا أنا مازعلتش لإن ده هشام ومعاه مني تصريح يعمل اللى هو عايزه، إحنا اخوات، بس استغربت بصراحة انت ليه يا نادر سبتنا عشان أغانينا مش بتنزلك لايف أيام الإعلان الدستوري، ورايح تعمل تانى نفس اللون".
اقرأ أيضًا: إلهام شاهين: لهذا السبب كنت سأعتزل الفن للأبد (فيديو)
وانهى أيمن بهجت حديثه مطالبًا من أبو الليف بالكف عن الحديث في هذا الأمر حيث كتب: "المهم لما مامشيتش الدنيا، ابتدى يلمح بتقصيرنا معاه فى اللقاءات والتزمنا الصمت، سمعت كلام من عينة إن أنا مانع ظهوره في القنوات، واستغربت إنه شايفنى بالقوة والسطوة دي وكلام كتير بيوصلني، بس مش ده المهم، من سنتين لقيت الفنان أحمد فهمى بيرشحه لتتر مسلسل الواد سيد الشحات، رحبت جدا وعادي والأغنية نزلت، فأنا حقيقي مش فاهم لحد دلوقتي هو بيقول ليه كده وعايز ايه واحنا قصرنا في ايه، ربنا يوفقك يا نادر ويكتب لك الخير فى حياتك، ومن فضلك كفاية لحد كده".
