رضا عبد العال يفتح النار على كيروش: «بنعلب كورة هيلا هوب والكفة تطب» .. فيديو

فتح رضا عبد العال نجم المنتخب الوطني السابق، النار على البرتغالي كارلوس كيروش المدير الفني لمنتخب مصر، بعد الخسارة أمام تونس في نصف نهائي كأس العرب.

وخسر منتخب مصر أمام تونس بهدف دون رد عن طريق عمرو السولية في مرماه، ليواجه قطر في مباراة تحديد المركز الثالث والرابع في كأس العرب.

وقال رضا عبد العال في فيديو عبر قناته على موقع "يوتيوب": "أنا حزين أكتر من كيروش حالنا مع الراجل دا في تصفيات إفريقيا وفي كأس العرب يحزن، إحنا بنلعب كورة هيلا هوب والكفة تطب، أنت وحظك سواء ربنا وفقنا ولا لأ".

وتابع: "إحنا منتخب معندوش شخصية والناس اللي بتهاجمني، بتهاجمني أنا ليه أنا عايز أشوف منتخبي بيلعب كرة على الأرض، يكون لينا طعم ولون ونخوف أي فريق وتونس كانت أقل فرقة والنهاردة اتفردت عليك والشوط الأول الاستحواذ كان ليهم، وقدام فرقة مدارس".

عبد العال ينتقد اللاعبين

وجه رضا عبد العال انتقادات لاذعة للاعبي المنتخب، حيث قال: "إيه حسين فيصل ومروان حمدي والناس بتقولي بيجرب، وهتلف وتدور مفيش غير لاعيبة الأهلي والزمالك، لأنهم بيلعبوا تحت ضغط باستثناء أحمد رفعت ومن أول ما شوفت التشكيل وعارف إننا هنخسر وانت عايز لاعيبة بتقف على الكرة".

وواصل: "من سوء حظنا، إحنا بندور على لاعب كرة روحت مطلع أفشة وسايب زيزو وحسين فيصل ومروان حمدي، قولي انتاجهم إيه النهاردة؟، وأحمد رفعت عنده دافع يبقى كويس، إيه لازمة شريف ينزل جناح؟، المنتخب دا عايز لاعيبة معينة وعندها حس واللعب تحت ضغط ".

وأضاف رضا عبد العال: "ألطم، الشوط الأول ممسكناش كورة إحنا عمالين نجري ورا تونس، وأول مرة نروح على الجون بشوطة حجازي وبعدين هجمة زيزو العشوائية ومروان حمدي بيرقص ومش عارف يحط الكورة في الجول".

وشدد: "أنا وطني أكتر منكم وحاسس إن أبويا مات بعد الخسارة، بطلوا الحقد والسواد اللي عندكم زهقنا والناس كلها زهقت منكم والناس ببتفرج عليا عشان بقول كلمة حق".

اقرأ أيضًا: كيروش عن الخسارة أمام تونس: الحظ تحدث الليلة

واختتم رضا عبد العال تصريحاته: "المنتخب محجوز للاعبين المحترفين وشوية لاعيبه كبار، والوجوه الجديدة اللي لعب في كأس العرب مش هتظهر مع المنتخب تاني".