نشوى مصطفى تكشف أسباب تعرضها للاكتئاب
كشفت الفنانة نشوى مصطفى، عن الأسباب التي عرضتها للإصابة بالاكتئاب، من خلال حسابها الشخصي، عبر موقع التواصل الاجتماعي فيسبوك.
وكتبت نشوى، قائلة : "حاحكى لكم حكاية على سبيل الفضفضة واسفة لو حازعجكم.. بقالي فترة طويلة مش بشتغل التمثيل اللي أتمناه اللي هو طموحي.. واللي هو أنا لحد اللحظة دي مامثلتش طموحي.. ولا حتى شبه طموحي.. إلا في شوية أعمال يتعدوا على الصوابع ومنهم مثلًا المسرحية اللي كتبتها على مقاس احلامي في التمثيل.. أقصد سيلفي مع الموت.. ولأن الكلام ده كان من أربع سنين فاالتمثيل وحشني أوي".
وتابعت:" كنت فاكرة أن أي شغل حيجى لي حوافق على طول.. لقيت نفسى بيتعرض عليا أدوار بقرأها واعتذر.. وبعد ما اعتذر اقعد فترة مكتئبة وألوم نفسى طيب ليه اعتذرت.. فانفسى ترد تقول لي ماهو أنتى ماحسيتيش إنك حابة اللي قريتيه يومين تلاتة وأنسى".
وأضافت:" الأول اتعرض عليا شغل والحقيقة النهاردة اعتذرت.. وكلمت الأستاذ المخرج المحترم الراقي وقلت له أسباب اعتذاري وكان رده كنت متأكد إنك مش حتوافقى وباحترمك جدًا لأنك رفضتي، لأن كان فيه رهان حد قال إنك حتوافقى لأن بقالك كتير بعيد، وأنا قلت له غالبًا حتعتذر رغم أن مساحة الدور كويسة... قلت له يااستاذ مثلًا الزميل العزيز ماجد الكدواني عمل مشهد واحد في مسلسل عظيم اسمه تحت السيطرة.. والحقيقة مفيش حد يقدر ينسى العظمة اللي عملها رغم إنه مشهد واحد الموضوع مش مساحة.. المهم اعتذرت وخلاص ولقيت نفسى بعدها مش مبسوط".
وأشارت:" كلمت ربنا وقلت له يارب أنا مش فاهمانى وحضرتك اللي خلقتني وعارف نقط ضعفى.. وطلبت منه يفهمنى ويرضينى بالمقدر ليا".
واستطردت:" سبحان الله بافتح الفيسبوك لقيت بوست مكتوب فيه من يترك كل أمره في يد الله سيجد يد الله في كل شئ يخصه.. وعلى طول غمضت عيني وابتسمت، لأن حسيت أن ده رد ربنا سبحانه عليا وبعدها قعدت أردد اللهم إنى أسلمت لك نفسى ووكلتك أمري فأنت حسبي ووكيلى، وصلى الله على سيدنا محمدًا النور واهله".
يذكر، أن آخر أعمال نشوى مصطفى، فيلم شاومينج، الذي قام ببطولته الفنان بيومي فؤاد، حامد الشراب، سامي مغاوري، صلاح عبدالله، والفيلم من تأليف أشرف حسني، ومن إخراج شادي أبو شادي.
أقرأ أيضًا: انطلاق تصوير مسلسل «شغل عالي» لفيفي عبده في رمضان 2022
