جريدة الطريق رئيس التحريرمحمد عبد الجليل
الخميس 8 ديسمبر 2022 07:47 صـ 15 جمادى أول 1444 هـ

«مراته غدرت بيه».. شقيقة صيدلي حلوان تروي اللحظات الأخيرة في حياته

الدكتور ولاء زايد- مصدر الصورة: فيسبوك
الدكتور ولاء زايد- مصدر الصورة: فيسبوك

حالة من الحزن خيمت على الجميع، وذلك عقب تداول بعض نشطاء مواقع التواصل الاجتماعي "فيسبوك"، مقطع فيديو لشقيقة ولاء زايد صيدلي حلوان، والذي يعد الظهور الأول لها بعد الواقعة الأليمة، واستطاعت من خلاله أن تكشف تفاصيل اللحظات الأخيرة في حياة الصيدلي ورسالة الاستغاثة على "واتس آب".


المشاكل الزوجية والانفصال


قالت الدكتورة أسماء سعيد زايد، شقيقة الصيدلي ولاء زايد، إنها ظهرت لتحسم الحديث المتداول حول أخيها: "أخويا خريج صيدلة طنطا 2010.. سافر السعودية 2013.. واشتغل هناك في صيدلية المهدي السعودية.. وكان لسه مترقي.. كان ماسك مدير فرع هناك.. ده غير أخلاقه وأدبه ومساعدته لكل الناس".

وأوضحت زايد عبر مقطع الفيديو المتداول على موقع التواصل الاجتماعي "فيسبوك": "اتعرف على زوجته الأولى في السعودية وكانت دكتورة صيدلانية هناك.. وكلمنا علشان يخطبها ووالدتي رحبت جدًا.. وبابا سافرله وقروا فاتحه.. ولما نزلوا أول أجازة اتخطبوا".

وأضافت شقيقة الصيدلي ولاء زايد: "والدتي اقترحت عليه إنه ياخد لزوجته الأولى شقة جنب والدتها في حلوان.. وبعد الزواج بدأت المشاكل الزوجية من قلة الاهتمام وتدخل الأهالي.. وبعد سنة خلفوا يونس وده اللي صعب الدنيا.. وكان بيحاول ينفصل بس استحمل علشان خاطر ابنه".

وواصلت الدكتورة أسماء: "حصل انفصال مرة ورجعها تاني لما والدها اتواصل مع والدتي.. وانفصل عنها مرة تانية وقالها خدي الشقة وهتكفل بمصاريف ابني كلها.. وكل الناس كانوا عارفين إنه تعبان مع مراته وناقصه حاجات كتير".


موافقة يتجوز عليا

وأكدت أسماء زايد: "زوجته قبل ميرجعوا لبعض قالتلي أنا موافقة إنه يرجعلي ويتجوز عليا.. أنا مش عاوزة أربي يونس لوحدي وبحتاج لولاء في كل حاجة.. علشان يونس يتربى بينا".

واستطردت: "في العيد نزل من السعودية وكانت عدة طليقته خلصت وطلب أنه يشوف ابنه ويقضوا العيد سوا.. وهي صممت تيجي معانا علشان ابنها مش هيعرف يقعد منغيري.. وقعدت معانا في البيت واتحايلت عليه يرجعوا لبعض.. وطلبنا منه يرجعوا لبعض وبالفعل رجعوا لبعض وسافروا سوا القاهرة.. مرضيتش تسافر معاه في السعودية آخر مرة".

عارف إيه مستنيني هناك

وأردفت: "نصحت أخويا إنه يشوف حياته وابنه مش هينفعه.. وماما شافتله واحدة ووافقت على ظروفه وخطبناها ليه وهو مش موجود.. وقالنا لما هينزل هيكتب الكتاب وهياخدها ويسافر.. وجاب شقته تحتنا وحط حاجته فيها بس أجلوا فرش الشقة.. قالنا إنه هيسافر يشوف يونس ويدفعله فلوس مدرسته.. وزوجته الأولى فضلت ترن عليه وهو ميردش عليها ويقول أنا عارف إيه اللي مستنيني هناك.. ولما وصل لمراته الأولى قال لها أنا مش هظلمك جربي شهر لو حسيتي إن في حاجة جاية على حقوقك انفصلي".

هجيب حق بنتي

وتابعت: "قبل الحادثة بيوم والدها اتصل على زوجي بالرغم إن مفيش تواصل بينهم.. وقاله أنا هجيب حق بنتي.. ولما جوزي اتصل حكالي طلبت منه أنه يعرف ولاء وبعدين أخويا قالي تقريبا أهلها ميعرفوش.. و طلب من ماما تبعتله شنطتة لحد الموقف علشان هيسافر تاني يوم".

استغاثة على واتس آب

واستكملت: "في يوم الحادثة صحيت من النوم لقيت رسالة عندي على الواتس آب من ولاء.. بيقولي متتصليش بيا وكلمي ماما تشوفلي حد من قسم حلوان عشان عندي بلطجية في البيت.. وكلمنا النجدة وعملنا بلاغ.. كلمت أخويا قالي دول حابسني في الأوضة ومراتي غدرت بيا وخدوا مني الباسبور وعاوزين يمضوني على ورق وأطلق زوجتي التانية.. وفعلًا اتصل بيها وقالها هطلقك وردت عليه انجد نفسك ياولاء".

رموه من البلكونة


وأعربت: "فجأة لقيت ولاء باعتلي هي هتنزل وأكلمك.. استغربت صيغة الكلام وقالي 10 دقايق وأكلمك.. وبسرعة كلمت ماما قلتلها مشيوا خلاص من عند ولاء.. لقيت ماما بتقولي مش هو اللي بيكلمك.. البواب قفل معايا حالا وبيقولي أنا طلعت أشوف اللي بيحصل لقيتهم هناك لسه قاعدين وطالبين أكل وبيقولوله دي مشاكل عائلية متدخلش".

وعقبت: "فضلت أبعت له رسايل وأقوله طمني عليك ومردش عليا.. في الوقت ده هما رموه من البلكونة.. البواب كلم ماما قالها الحقي ابنك وقع من فوق.. ماما قالتله ابني مات أنا حاسه".

حرقوا قلبي عليك


وذكرت: "جوزي مرضيش يقولي اللي حصل وسافرنا لولاء.. جالنا تليفون بوفاة أخويا وسمعت ماما بتقول حرقوا قلبي عليك يا ابني.. وجوزي حاول يخبي عليا وفاة أخويا وكان بيبكي.. وصلنا المركز لقيت ماما بتقولي ولاء رموه من البلكونة ومات".

القصاص وحق ولاء يرجع

واختتمت حديثها: "أبويا مات من سنتين بالكورونا وكانت فاجعة كبيرة.. ولاء كان دايما سند لينا وموجودين بحسه.. فلما ماما قالتلي ولاء مات انهارت من العياط.. ازاي ولاء العريس مات.. اتهمنا أهل مراته الأولى بإنهم رموه من البلكونة.. وروحنا النيابة تاني يوم وخدوا أقوالنا.. ولسه تصريح الدفن مطلعش.. بنطالب بالقصاص وعاوزين حقه يرجع.. أخويا ميستاهلش يحصل فيه كده".

اقرأ أيضًا: مصير طفل الصيدلي المقتول على يد زوجته؟ قانوني يجيب