موقف إنساني مؤثر لـ أيتن عامر: هذا الرجل علمنى اتأدب مع الله في ابتلائي
كشفت الفنانة أيتن عامر، عن قصة حقيقية تعرضت لها أثناء ذهابها إلى إحدى ماكينات "ATM"، ومساعدتها لرجل أعطها دراساً، لذلك نشرت تفاصيل هذه القصة عبر صفحتها الشخصية بموقع التواصل الاجتماعي فيسبوك.
وكتبت أيتن عامر: "لطف الله بقالي ساعة بلف بالعربية عشان ألاقي ماكينة ATM فاضية عشان أعرف اسحب فلوس ومش لاقي يا عطلانة يا زحمة جدا.. مشيت كتييير عشان ألاقي وآخر ما زهقت لقيت واحدة خفيفة شوية نزلت متأففة جدا إني هقف في الطابور.. المهم وقفت لاحظت الراجل اللي قدامي حد في أوائل الخمسينات من عمره ومن الطبقة المطحونة.. الراجل كان عرقان جدا وجسمه بيتنفض مع إن الجو مش حر ولا حاجة بس ماركزتش أوى معاه".
وتابعت: "بعد شوية لقيته بيقولي هستأذنك بس تحجزلي المكان عشان مش قادر أقف وخايف أقعد يروح عليا دوري، فقلت له اتفضل ودورك محجوز، الراجل قعد على الرصيف اللى جنبي وبدأ ينشف العرق اللى مغرقه ورافع إيديه للسما وبيقول: يا رب أنا مينفعش خالص أعيا النهاردة بالذات خد بإيدي بس لحد بكره يا رب.. الراجل كان بيتوسل لربنا إنه ميتعبش بطريقة لفتت انتباهي.. قربت منه وسألته: أنت كويس؟.. قالى كلمة هزتنى بجد: الحمد لله فى زحام من النعم.. بقوله واضح إنك تعبان طيب ما تروح لأقرب دكتور، لقيت الراجل عينيه دمعت وهو بيقولي ماينفعش أتعب يا أستاذ دي رفاهية أنا مش قدها".
وأسطردت: "أنا زوجتي متوفية من 8 سنين وعندى 4 ولاد كبيرهم فى الكلية ومحتاج مصاريف كليته النهاردة ووعدته إنى هقبض وأروحله الجامعة اديهومله.. التلاتة التانيين في ثانوى وإعدادى وكتر خير والدتي كانت بتراعي ولادي بعد موت مراتي.. لكن دلوقتي أمي كمان مريضة مرض موت وبراعيها هى وعيالي.. أنا موظف حكومة مرتبي 2700 جنيه وبشتغل بعد الظهر عامل توصيل مطعم بألفين جنيه وكل ده مش ملاحق على البيت والولاد والدروس ومصاريف علاج والدتي.. صاحب البيت كاسر عليا إيجار متأخر وآخر معاد النهاردة عشان ياخد نص فلوسه بعد محايلات منى ومن الجيران عشان ميرميش عفشي وأمي المريضة وعيالي في الشارع".
وأضافت: "أنا وقفت قدام كلام الراجل مش عارف أقول إيه.. الراجل عنده كل ده وبيقولي: الحمد لله فى زحام من النعم، وأنا اللي ظروفي أحسن منه مليون مرة متضايق ومخنوق.. كأنه إداني قلم على وشي وقالي أنت جاحد بنعم ربنا.. المهم بعد ما صرف الفلوس أخدته المستشفى بعد محايلات مني وأصريت استناه وأوصله بيته بالعربية.. عشان اتفاجئ بمفاجأة أكبر.. والدته في التمانيين من عمرها وكفيفة وراقدة على فراش الموت وكل كلامها حمد لله على نعمة وشكر لله على واسع فضله بصيت حواليا أشوف واسع فضل الله اللى بتشكره عليه لقيت بيت عبارة عن دور أرضي حيطانه أكل عليها الزمان وشرب وكله رطوبة الفرش سريرين ودولاب وكنبتين بلدى وحصيرة.. لسه ببص حواليا لقيت الباب بيخبط وطلع كلامه حقيقي كان صاحب البيت عاوز فلوسه وداخل يزعق ويتوعد ويهدد بطرده.. المهم بعد تدخل منى ورفض شديد من الراجل المحترم ده اللى علمنى درس عمرى كان رافض تماما إنى أدفع الفلوس بتاعة الإيجار".
اقرأ أيضا| بإطلالة مثيرة.. سناء يوسف تشعل السوشيال ميديا (صور)
واختتمت: "دفعت الفلوس لصاحب البيت ومعاهم إيجار سنة مقدم وأخدت منه إيصالات الإيجار واديتهاله.. الراجل فضل يعيط زي الأطفال ويقولي: أنت طلعتلى منين؟ أنا طول الليل منمتش وعمال أصلى وادعى ربنا يسترنى وما اتفضحش قدام الجيران في الشارع، قلتله ربنا عطل لك 4 ماكينات صرافة وزحم 6 ماكينات تانيين عشان يبعتنى ليك وبعتك أنت كمان ليا عشان تعلمنى اتأدب مع ربنا في ابتلائي.. اللهم لك الحمد حمدا كثيرا طيبا كما ينبغي لجلال وجهك وعظيم سلطانك".
