بعد الهجوم عليها.. عارفة عبد الرسول لـ”الطريق”: ده مايوه عواجيزي وكلنا هنقابل ربنا عرايا

تعرضت الفنانة الكبيرة عارفة عبد الرسول للهجوم الحاد عليها والنقد اللاذع، بعدما نشرت صورة لها ظهرت خلالها بالمايوه في أول مرة تفاجئ جمهورها بإطلالة جريئة، وذلك خلال قضاء عطلتها الصيفية، وعلى خلفية ذلك تصدرت مؤشرات البحث على جوجل.

وعلقت عارفة عبد الرسول على الصورة التي نشرتها عبر حسابها الخاص بموقع التواصل الاجتماعي "فيسبوك"، وأثارت من خلالها حالة واسعة من الجدل: "لقيت الطبطبة".

مايوه عواجيزي

وقالت عارفة عبد الرسول في تصريح خاص لـ "الطريق": "الصورة عادية جدا بالنسبة لي، الناس بتقول بكيني لكن هو مايوه عواجيزي مش قطعة واحدة ولا قطعتين، هو مايوه بشورت وجيب ولا بكيني ولا بوركيني متوسط".

أضافت الفنانة الكبيرة في تصريحها: "باعتباري إسكندرانية طول عمرنا بنلبس مايوه، أبويا كل سنة كان بيجيب لنا مايوه، والناس حرة هي دي طريقتها وحياتها ولا فكرت أرد عليها هي دي قناعاتهم في الحياة".

هنقابل ربنا عرايا

تابعت: "واحدة نصحتني أشيل الصورة بس أنا مش النوع ده أنا مقتنعة بيها، ولا عاملة ميكب ولا الصورة أوفر"، مضيفة: "في تعليق كان نفسي أرد عليه وكنت بفرك علشان ارد واحدة بتقول لي نفسي أعرف هتقابلي ربنا إزاي؟ كنت عاوزة أقولها كلنا هنقابل ربنا عرايا".

أنا مش ماشية في الشارع والبحر اتعمله مايوه

وواصلت عارفة عبد الرسول لـ"الطريق": "مش حكاية مايوه في الأول وفي الآخر ربنا في روحك مش في اللبس ده بحر، أنا مش ماشية في الشارع ،والبحر اتعمله مايوه أكيد مش هلبس جلابية، وإحنا من جيل السبعينات دي طبيعة لبسنا كانت لسة الدنيا جميلة وأنا مصرة أحافظ على الدينا الجميلة دي".

واستطردت: "علميا جسمك المفروض يتعرض للشمس والمياه المالحة واللي بيلبس البوركيني هو حر وله مطلق الحرية لكن الجسم مش بياخد كفايته من البحر والماية المالحة".

 ربنا دخل عاهرة الجنة عشان سقت كلب

واختتمت حديثها قائلة: "لو كل واحد يبص في ورقته الناس هترتاح ربنا دخل عاهرة الجنة علشان سقت كلب الموضوع أكبر من كده محدش يعرف ربنا هيحاسبنا إزاي".

كانت عارفة عبد الرسول تلقت العديد من التعليقات المهاجمة لها كالتالي: "والله نزلتي من نظري أعوذ بالله ست في آخر أيامها تلبس بكيني اتقي الله"، "اتقي الله في سنك... حضرتك ست كبيرة المفروض تبقي قدوة طبطبة اية بس إنا لله وإنا إليه راجعون"، "كمية الناس العمالة تهني وتشجع الله يهديكم...كنت بحترمك وبحترم تمثيلك... لكن كدة.. الله يهديكي ويهدينا جميعا".

آخر أعمال عارفة عبد الرسول

كانت آخر أعمال الفنانة عارفة عبد الرسول من خلال مشاركتها في مسلسل "رجالة البيت"، من بطولة أكرم حسني وأحمد فهمي، وتشارك في فيلم "النمس والإنس" للنجم محمد هنيدي، وتجسد دور والدته خلال أحداث العمل، والفيلم من تأليف كريم حسن بشير، وإخراج شريف عرفة.