تامر حسني يوجه عدة نصائح هامة لجمهوره.. تعرف عليها
وجه النجم تامر حسني عدة نصائح هامة لجمهوره من خلال خبراته والمواقف اليومية التي يتعرض لها.
وكتب حسني عبر حسابه على الفيس بوك: "من امبارح وأنا بحاول أقرأ كل تعليقاتكم وطبعاً تأثرت جداً ولقيتني غوصت جوه ماسورة طاقة سلبية رهيبة بس التحدي إني استوعبها كلها وأخرجها لكم إيجابية أقسم بالله قاعد أقرأ تعليقاتكم من امبارح متحركتش من مكاني، قسّمت الردود على كل المواضيع وبرضو بقول إن ردودي نابعة من أخ ليكم وإنسان عاش تجربة كبيرة من الظلم والنجاح و شوفت فيها كل اللي هشرحه في البوست.. نوعية أسئلة الدنيا رايحة بينا على فين و الكورونا و الحروب والقدريات كلها اللي احنا كبشر ملناش ذنب فيها دي في إيد ربنا مش في ايدينا غير الدعاء و التفائل بالخير بس أنا هتكلم أكتر في اللي في إيدنا".
وتابع حسني "على قد ما قرأت و جمعت آراء من خلال الآراء المتشابهة اللي معظمها اتكلم عن الوساطة والمحسوبية والفشل والإحباط وضعف الثقة بالنفس والعنصرية، تناقض المجتمع وعدم الأمان في الدنيا وعدم فرص العمل هحاول أرد على حد علمي وخبرتي المتواضعة في الحياة لعل شخص واحد يقتدي برأيي مش هتكلم على اختلاف عادات المجتمعات لإنه موضوع نسبي و يتعلق ببلدك وتربيتك وعاداتك وأسرتك، لازمه شرح كبير وأسئلة كتير نسبية رايحة جاية".
وأضاف "نيجي لموضوع الواسطة والمحسوبية وكل ما ذكرته في أول الكلام هو فعلاً موجود بشدة و بقسوة وأنا شخصياً مريت بيه وقهرته وأنا طفل و شاب فقير اتعرضت لكل ما ذُكز، يا جماعة بما إنك عايش في مجتمع فيه كدا يبقى مش قدامك غير التميز الواضح عشان كفاءتك تخرج، أي مسئول أو مدير يعني لو انت دلوقتي شخص ذو كفاءة عالية لازم تشتغل على نفسك تاني وتبقى ذو كفاءة عالية جداً جداً ومتميز كمان والأهم يكون عندك ثقة كبيرة في ربنا ملهاش حدود، عشان هو شايفك وأكيد هيكافئك على مجهودك بس انت اتعب وأعرف إنك تتعامل مع ظروف مجتمعك الحالي".
واصل: "هو عصر صعب بس ينفع تنتصر عليه أما فكرة الفقر والظروف الصعبة عايزك تفهم إنك مش لوحدك خالص معظم الناس كدا وفيهم مستسلمش لظروفه ومرضه وقرر يقهر الظروف دي، افتكر دي دايماً إن في واحد اسمه ((لولا دا سيلفا)) كان فقير وخرج من المدرسة وصباعه اتقطع واشتغل ماسح أحذية وتعب وكافح واجتهد وصبر وفكر يتميز لحد ما وصل بقى رئيس جمهورية البرازيل".
واستطرد "نيجي للصفات المجتمعية اللي مزعلانة كلنا وتغير قلوب الناس والشتائم الجارحة في التعليقات يعني تلاقي بعض الناس مباركين أوي لعلاقة شخص مصاحب واحدة وبيتريقوا على شخص اتجوز واحدة، واحد محترم المجتمع و الاعلام متجاهلينه وشخص مهزء عاملين له سعر".
تابع: "الدنيا بقت فجأة ماشية بالعكس تلاقي إنسان حثالة وسفيه بقى مشهور فجأة ومعاه فلوس وجهات مسؤله بتهتم بيه وتكتب عنه لأنهم شايفين إنه ليه موردين فبيتاجروا بيهم وبعددهم وسايبين توعية وإنقاذ فكر المجتمع وشبابه الصاعد طبعاً دا شيء سلبي وأحد سمات عصرنا، محتاجين نفهم أن السيرة الطيبة هي الأهم واللي بتدوم يعني مش كل مشهور فهو صاحب سيرة طيبة، ما احنا ممكن نسمع عن حرامي مشهور أو سفاح مشهور هل دا معناه أننا نقتدي بيه أكيد لأ، خلوا اللي يلفت نظركم اللي سيرته كويسة ميغركوش الشهرة مع شخص فاسد".
وأشار إلى أن السيرة الطيبة أهم وأرقى من الشهرة في المطلق زي ما العطور لها رائحه نفاذة القمامة أيضاً لها رائحة نفاذة المهم إنطباعك الطيب.. الدنيا كلها كدا والشر نَفسه موجود وصوته عالي كل اللي علينا أننا نتجاهل أي شخص يصدر فساد وتخلف ونركز مع الناس اللي ممكن تفيدنا".
فيما علق حسني على الصفات التي تزعج البعض قائلا : "نيجي لبعض الصفات الشخصية اللي تزعجنا زي التسرع وتضييع الوقت والطيبه الزائدة والشخصية المترددة والشخص اللي كل شوية يحاول ويفشل واللي بياخد كل حاجة على أعصابه، كل الحاجات دي عايزة تمارين حقيقي مع النفس أولاً هطمن كل اللي كاتب عيوبه".
استكمل: "هو لمجرد إنك عارف عيبك ومعترف بيه دي أول خطوة إيجابية لعلاجك لازم انت تقوّم نفسك أنت تبقى مُعلّم نفسك هو دا الصراع الدنيوي الحقيقي انك تقاوم نفسك و تطور منها، بص لعيبك حالاً وكلمة قوله أقسم بالله هتخلص منك قول هبطل مخدرات، هبطل سجاير، هبطل خمرة، هخس، هتخن، هتمرن، هواظب على الصلاة مش هبص لحياة غيري، هبطل اللي مضايقني من نفسي أياً كان وهبدأ في التمرين كل ما تجيلك فكرة سلبية في دماغك حط مكانها عكسها حط الإيجابي، كل ما تجيلك فكرة محبطة إنك مش هتقدر قول لأ أنا هشوف الفكرة مليانة أمل وشايف نفسي قادر".
واصل: "أرجوكم كلكم لازم لازم لازم كل حد فيكم يشوف نفسه في خياله شخص ناجح ومحقق اللي نفسه فيه هتقدر تبني في خيالك طاقة جذب لشيء جميل فمخك هيعمل كل جهده إنه يفكر أحسن و يوصل للهدف الجديد اللي أنت زرعته قدامه : تنبيه والعكس صحيح.. أرجوكم قبل ما تناموا افتكروا حجات حلوة تفرحكم دي آخر حاجة تسيبوها في مخكم قبل ما تناموا عشان هتصحوا عليها فلو وحشة هتصحوا متنكدين .. لو حلوه هتصحوا فرحانين و يومكم أجمل".
واختتم حسني نصائحه: "تحديات المرض وصبرك عليه والتعايش بصدر رحب مصاحب بإيمان حقيقي لكلمة الحمدلله، ليه أجر أعظم من أي حاجة وخلي الأمل دايماً موجود ولو حتى الدكاترة أكدولك إن مفيش أمل في الشفاء، اعرف إن ربنا قادر على كل شيء، ولو يا سيدي ربنا أراد بقاء المرض معاك فاعرف إنه اختار لك أصعب إمتحان عشان شايلك أكبر أجر بس قول من قلبك الحمد لله بإيمان تام مش كلام بس وأبدأ في رحله جديدة في التعايش مع مرضك وقول هنجح برضه لأن في نماذج كتير في الدنيا زيك وأكتر ووصلوا لقمم النجاح متبصش تحت رجليك متبصيش تحت رجليكي الفوز العظيم مش في الدنيا والله الدنيا دي محطه بتأسس و بتبني فيها حياتك الأبدية".
يذكر أن النجم تامر حسني قد طرح مؤخرا ألبوم بعنوان "خليك فولاذي"، وضم العديد من الأغاني، أبرزها : "قولني كلام"، "مبطلناش إحساس"، "فجأة إفترقنا "، و"قد الفراق".
