الحسين والزينة والمطبخ .. طقوس نجوم الفن في رمضان
** نسرين طافش: «بحب أطبخ لصحابي وأعمل زينة رمضان وأتفرغ للعبادة»
** بيومي فؤاد: «بسهر على القهوة وأصلي الفجر في الحسين»
** محمد فراج: «كنا بنستنى رمضان وإحنا عيال عشان نعلق الزينة»
** منال سلامة: «كنا بنعمل الزبادي والفول في البيت والمسحراتي ينادي أسمي»
** أحمد كرارة: «أفتقد أمي وأبويا اللي كانو معانا علي سفرة الفطار»
** منة جلال: «كورونا خلتنا نفتقد بريق رمضان، والسنة ديه مختلفة عشان هقضيه مع زوجي وننتظر المولود»
** محمد خطاب: «بختم القرآن في رمضان وأفتقدت العزومات بسبب الكورونا»
يأتي شهر رمضان بالبهجة والفرح، على الجميع، الذين ينتظره من العام للعام، حتى يستمتع بلمة العيلة وزينة رمضان والتراويح والدعاء، ولكل فنان طقوسه الخاصة وذكرياته مع الشهر الكريم، لذلك حاورت «الطريقۚ» العديد من النجوم لمعرفة طقوسهم الخاصة وما إفتقدوه من رمضان زمان.
أحب الطبخ
كشفت الفنانة نسرين طافش، طقوسها في رمضان قائلة: "دايما في رمضان بحب أطبخ لأصحابي، وأعمل زينة رمضان، الحاجات دي تهمني جدا، ورمضان السنة دي هتفرغ للعبادة والروحانيات وقربي من ربنا، لأن رمضان هو شهر واحد في السنة ولازم نطلع بيه بحاجة حلوة، لازم لمة العيلة تبقي موجودة، ولما بيبقوا بعاد عني أو بشتغل مبقدرش أعمل حتي الطقوس الرمضانية البسيطة.
الصلاة في الحسين
وقال الفنان بيومي فؤاد، "أتمنى السنة كلها تبقى رمضان، من كتر حبي في هذا الشهر الجميل الفضيل"، وذكرياتي مع الشهر الكريم كانت مختلفة لأنني كنت عايش في طفولتي بمنطقة الزمالك، والمشكلة إنه لا يوجد بها مكنش كواليس رمضان مثل المناطق الشعبية، فكنت أذهب إلى إمبابة وبولاق، والسيدة زينب لأصحابي حتى أسهر معاهم وأعيش أجواء رمضان، وكنا "نسهر على القهوة ونلعب ضمنه طول الليل"، ونصلي الفجر في الحسين، وما إفتقدته في رمضان أن الشغل والشهرة حرمتنا من أشياء كثيرة جدا مثل "إني أبقي في رمضان وسط الناس وأستمتع بالشهر الكريم زي زمان"، ولكن أحاول أن أحرص على معايشة جو رمضان، "حتى وأنا ماشي بالعربية أروح المناطق الشعبية، وبفرح وبدمع لما بشوف الفوانيس متعلقة في الشارع، من نصف شعبان أو أول 10 أيام في شعبان، وبحب شهر رمضان قوي وبزعل جدا لما بيخلص".
اقرأ أيضا: رامز جلال لـ حمو بيكا: ”كرشك قافل على سورتك” ورد غير متوقع من مطرب المهرجانات (فيديو)
بعلق الزينة
أكد الفنان محمد فراج، أنه يواجه هذا العام مشلكة إنتي أصور في رمضان، "كان نفسي يبقي عندي تفرغ أكتر لروحانيات رمضان، والصوم والصلاة بشكل دائما، والشهر الكريم دائما بيبقي حاجة مختلفة ودائما كلنا بنستنى الشهر من واحنا عيال صغيرة عشان نعلق الزينة والجو الجميل اللي كلنا عشناها".
الفول في البيت
وكشفت الفنانة منال سلامة أن طقوسها في رمضان وهي طفلة أحسن بكثير من أطفال الآن، لأننا كنا نجهز للشهر الكريم "كنا بنعمل الزبادي في البيت، ومامتي كانت تدمس الفول في البيت، كنا بنجهز الحاجات دي قبل رمضان، حتى لو كنا بنعملها الحاجات دي طول السنه، بس كانت في رمضان حاجة تانية، وبنجهز للعزومات مع قرايبي، لو عندنا أوعندهم"، ومن ذكرياتي مع رمضان "الفانوس أبو شمعة كنا فرحانين بيه جدا، لكن الفانوس أبو بطارية في الأول كنت بحبه، وبعد كده فهمنا إنه مش شبهنا، والمسحراتي دائما أمي وأبويا كانوا يخلوا ينادي بإسمي، إصحي يمنال، كنت بفرح جدا، كنا الجيران نجمع بعض أطفال وكبار ونروح نصلي الفجر في الجامع، دي بتبقي حاجه تانيه خالص، واحنا صغيرين مكناش فاهمين يعني اي صلاة ترويح، بس كنا بنروح مع أهلينا الجامع نصلي، ومن التسلية بتاعتنا فوازير رمضان زي نيللي من أحلى الفوازير في الدنيا، كنت أشوف الفزورة أنزل أمثلها في الشارع، وإحنا أطفال الذاكرة بتاعتنا كانت حديدية كنت أحفظ الفزورة بالأغنية، وأنزل أخذ طرحة ماما والكرسي وأنزل أمثلها في الشارع"، الحقيقة الأجيال الحالية لم يستمتعوا برمضان، "كنا بنجيب ورق الجورنال والجلاد بتاع كتب المدرسة ونعمل زينة رمضان، وفانوس رمضان، ونعمل مدفع رمضان عند الحداد ونجيب البارود وقت الإفطار نضرب المدفع قدام البيت".
انتظر مولودي
وقالت الفنانة منة جلال إنها إفتقدت إلى بريق رمضان والأجواء الجميلة فيه، والسبب كورونا، "لأنها خلتنا نفتقد كل حاجة، رمضان بعد كورونا مفيهوش بريق ولا حلاوة زي زمان"، طقوسي في رمضان أقضيه في البيت مع العائلة، وتختلف لأني أقرب أكثر من ربنا فيه من صوم وصلاة، وهذا العام رمضان رمضان مختلف لأني مع زوجي وننتظر "المولود"، "وأحلى حاجة في الدنيا أمي ربنا يخليهالي وتبقي كل رمضان معايا لازم أفطر واتسحر معاها، دي عندي بالدنيا".
افتقد أمي
وقال الفنان أحمد كرارة طقوسي في رمضان، هي التقرب من الله والإفطار مع العائله ومتابعه المسلسلات والبرامج، وأفتقد إلى أيام الطفولة وصوت المسحراتي وزينة وفوانيس رمضان، و"أفتقد أمي وابويا اللي كانو معانا علي سفرة الفطار".
بختم القرأن
وكشف الفنان محمد خطاب أن طقوسه تبدأ من قبل شهر رمضان، حيث أنه يقوم هو وزوجته بتغير شكل ألمنزل ويضعه الزينة، وأضاف: "كان أول دايما يوم نفطر مع العيلة بس للأسف رمضان اللي فات كان مختلف وحزين بسبب كورونا، الموضوع أتغير بس بنتاقلم على الوضع الجديد، زمان كنا نتسحر برة ونفطر برة والعزايم ماكنتش بتخلص بس الحمدلله على كل حال بس عموما مازال رمضان أحلى شهر في السنة كلها بيبقى في دفىء مش موجود في أي حتة ودايما بعد الفطار أنا ومراتي نقعد نتابع المسلسلات اللي بنشوفها وبليل بعد صلاة الفجر بقعد أقرأ القرآن، وختمتة السنة اللي فاتت وإن شاء الله هختمة السنة دي كمان، وطبعا الحلويات ليها نصيب الأسد"، إفتقدت أجواء الزينة في الشوارع، الروح اللي مصر بتعيشها وقت رمضان.
