”انت بتضيع مجهودي”.. الملحن مدين يشن هجومًا على حلمي بكر

هاجم الملحن مدين، الموسيقار الكبير حلمي بكر وذلك بعد تصريحاته الأخيرة عن لحن أغنية "حاجة مستخبية" للمطرب محمد حماقي، قائلًا إنه لم يحقق النجاح.

ورد مدين عبر صفحته الرسمية بموقع تبادل الصور والفيديوهات "إنستجرام"، قائلًا: " فيه موضوع كل الناس بتتكلم عنه إلا أنا.. رغم أن أنا صاحب الموضوع وهو لحن حاجة مستخبية اللحن التركي والإسرائيلي كمان ومهرجان بنت الجيران.. بس أنا ساكت عشان مابحبش اعمل شو عالفاضي".

وأضاف: "بس لما الاقي الأستاذ حلمي بكر طالع امبارح مع الاستاذ عمرو أديب في برنامج الحكاية و قناة مهمة زي mbc بيتكلم على لحن اغنية حاجة مستخبية ان ده لحن ماحققش نجاح مع المطرب اللي اخدها (يقصد حماقي) وأن اللحن ده مسروق من لحن تركي".

وتابع الملحن الموسيقي قائلًا: "عايز أقوله يا أستاذ حلمي اللي حضرتك ماتعرفوش ان الحمد لله لحن حاجة مستخبية كان مع مطرب كبير مش نكرة وهو الفنان الكبير محمد حماقي وحقق نجاح كبير جدا في مصر والوطن العربي لدرجة أن النجاح ده وصل لتركيا وتواصلوا معايا بكل احترام واخدوا مني اللحن بشكل رسمي واتترجم للتركي مع نجمة كبيرة بحجم ebru yasar".

اقرأ أيضًا: حلمي بكر عن نجومية الهضبة والكينج: «مالهومش مثيل»

ولم ينتهي مدين عند هذا الحد وأضاف: "حضرتك ممكن تتأكد بنفسك ان اسم الملحن محمد احمد فؤاد زي اسمي في التنازل وبتواصل دلوقتي معاهم عشان اسم الشهرة.. وعايز أقول لحضرتك حاجة قبل ما تطلع في برنامج كبير زي ده لازم تتاكد من معلوماتك كويس عشان انت كده مافرقتش عنهم حاجة هم سرقوا مجهودي وحضرتك بتضيعه وده شيئ يؤسفني أنه يخرج من أستاذ كبير زي حضرتك".

واختتم مدين: "ومش بس كده للأسف في حد اتهمني كمان إني سارقه من إسرائيل دخلت لقيت انهم سارقين مني فعلا جزء من اللحن مش اللحن كله والتاريخ كان من بعد نجاح الأغنية بثلاث سنوات وده للتوضيح مش أكتر".