ريهام سعيد: للأسف وقعت في مشاكل كتير بسبب تربيتي
يبدو أن أزمة الإعلامية ريهام سعيد الأخيرة بسبب حلقة صيد الثعالب والتي عرضتها لهجوم شديد وإيقاف برنامجها قبل عودته مرة ثانية، تسبب لها حزنًا، حيث أعربت ريهام عن حزنها الشديد وصدمتها من بعض معارفها الذين هاجمهوها، وسردت تفاصيل معانتها طوال حياتها المهنية، مؤكدة أن لو شخصًا أخر مكانها لكان مات حزنًا.
ونشرت ريهام صورة لها مع والدها وهي تطعم طائرًا، وكتبت: "الصورة دي من ٣٥ سنة في إنجلترا، إحنا اتربينا على حسن معاملة الحيوانات والبشر أبويا وأمي للأسف ربوني أنا وأختي على الرحمة والطيبة والأدب وبقول للأسف لإن أنا وأختي ياما اتعرضنا ووقعنا في مشاكل بسبب الطيبة والأدب والجدعنة وأي حد اتعامل معانا عارف كده ".
أضافت: "سكت كتير بس مش قادرة، طبيعي لما تكون حد مشهور إنك تتعرض للانتقاد أو تتفهم غلط لإن ماحدش يعرفك شخصيا وطبيعي إنك تعتذر لجمهورك لان هو اللي عملك وفضله عليك بعد ربنا حتي لو مش غلطان، الصادم في الموضوع الناس اللي تعرفني وتعرفني كويس عارفة بيتي وأهلي وتربيتي وشخصيتي".
واصلت: "علي سبيل المثال في ست بيني وبينها مش هاقول صداقة لكن علي الأقل معرفة وعيش وملح من أكتر من عشرين سنة الست دي حطت بوست تهاجمني في أزمه حلقة الحيوانات البرية مع إنها كان ممكن تكلمني في التليفون تعاتبني أو حتي تشتمني لو شايفاني غلطانه البوست بيتحط من الغريب عشان يوصل صوته أو عشان يضرني انتي حطيتي بوست ليه ؟ انتي و الزملا اللي تعرفني شخصيا".
استكملت: " الست دي جوزها عنده عربيه كبده بيبيع ساندوتشات أنا مش بسخر لأن أي شغلانة شريفة وحلال فهي نعمة أنا قصدي انه بيبيع لحمة يعني بتتدبح مش نباتيين هي وجوزها عشان تاخد صف التعلب وتبيعني خصوصا إنها حطت البوست وهي ماشفتش حاجة ولا فاهمة حاجة هاتقولوا الدبح خلال وصيد الخيوانات البريه حلال".
واستطردت :"وبعدين إحنا مش بتتكلم في حلال وحرام دي بتقول إن روح التعلب هاتختصمني يوم القيامة مع إن التعلب مماتش ولا حصل له أي حاجه غير إن من ٦٠ سنة الصيادين مش أنا بيصطادوا التعلب بانهم بيقفلوا الحديدة علي رجليه زي ما بتصطاد الفار والمصيدة بتقفل علي ديله هل ده تعذيب؟ ما علينا".
أردفت: "الست دي عارفة إني تقريبا بقالي ٤ سنين مش بشتغل وشافتني بعد ٥٠ يوم سجن وأنا مهلهلة وبحاول أقف علي رجلي، الست دي عارفة إن عندي مسؤليات مادية رهيبة ايوه أهلي ميسورين الحال لكن أنا بحب أعتمد علي نفسي وعيب بعد كل ده إني أروح أطلب من أهلي أو جوزي اللي ملوش ذنب في مسؤولية أولادي مع انهم ساعدوني كتير".
تابعت:" الست دي تعرف إني بعد سنة وقف يستجمع كل قوتي عشان أقف علي رجلي المرة العاشرة وعارفة اد ايه أنا اتظلمت وعارفة اد ايه بحب الناس والخير وعملت ايه في حياتي وضحيت بأيه عشان اسعد غيري، الست دي صعب عليها التعلب في صورة مفبركة و ماصعبش عليها ولادي لو شغلي وقف، صعب عليها التعلب اللي أنا متاكدة إنه لو عض بنتها أو أموتها هاتقتله".
