حورية فرغلي توجه رسالة عبر الطريق: ”ادعولي أنا بتعذب لأني في الآخر بنت ومش متجوزة” (فيديو)

تصدرت الفنانة حورية فرغلي، قائمة التريند في محرك البحث بجوجل، اليوم الاثنين، وذلك بعد أن أثارت تعاطف الكثيرون بسبب أزمتها الصحية والتي أثرت على ملامحها بشكل كبير، وأبعدتها عن الأضواء والأعمال الفنية.

ووجهت حورية فرغلي، رسالة خاصة للجمهور عبر "الطريق"، قائلة: "ادعولي وبطلوا تقولوا عليا إني عاملة عمليات تجميل، لأن أنا بتعذب، بقالي 4 سنوات مبعرفش أنا باكل إيه لإني فقدت حاسة التذوق والشم، لو في حريقة مش هعرف لأني مابشمش، ومش عارفة أسافر وأعمل العملية في أمريكا بسبب كورونا".

رسالة حورية فرغلي

وتابعت: "أنا حابسة نفسي في أوضتي بقالي سنة محدش بيشوفني، ودكتور واحد في العالم هو اللي يقدر يصلح أنفي، أنا مش ذنبي إني كنت في بطولة ورافعة اسم مصر وحصلتلي الحادثة، كل ده تصحيح أخطاء دكاترة أنا لا بعمل عمليات تجميل ولا فكرت في ده، أنا كنت ملكة جمال مصر، أنا بعد مسلسل مملكة الغجر بعدت عن الناس لأن جالي تعليقات صعبة جدا".

وعن سبب اختفائها عن الإعلام، قالت: "أنا كنت هسافر وجت الكورونا وقفت كل حاجة، وكنت بعدها هتطلع وأتكلم، وبعدين أنا بنت ومش متجوزة، وشكلي ومناخيري لما تتغير، أنا بقالي سنتين مش ببص في المرايا الموضوع صعب عليا، الناس مش عارفة أنا حاسة بإيه".

وكشفت عن سبب عدم مشاركتها في الأعمال الفنية، قائلة: "أنا مبقاش بيجيلي شغل بسبب شكلي، كل الناس بعدت عني، تليفوني مبقاش بيرن، حتى اللي وقفت جمبهم وساعدتهم محدش منهم بيكلمني، اللي بيسألوا عليا في النجوم هما لبلبة ورانيا محمود ياسين وعزة بنت فيفي عبده، بس لكن كل اللي اشتغلت معاهم أو طلعتهم معايا مافيش خالص، للدرجادي الدنيا وحشة، ولما حد بيجراله حاجة الناس بتتخلى عنه، وحتى اللي كانت ماسكة شغلي برضه سابتني".

اقرأ أيضا: فيفي عبده تخطف الأنظار في أحدث ظهور لها (صورة)

واختتمت رسالتها قائلة: "أنا ليه هعمل تجميل هو أنا عندي كام سنة عشان اعمل عملية تجميل، ما يشوفوا صورتي في فيلم كلمني شكرا، وهما يعرفوا، أنا الحصان وقع على وشي، ماكنش في مناخير ولا هيكل عندي، وجبت تقارير عشان يبطلوا يقولوا تجميل، مافيش فايدة، ومش فاهمة ليه ميجيش دعوات للمهرجانات ولا حد بيقدرني على شغلي مش فاهمة ليه".