شادي خفاجة: ”أغلب المقربين هيتصلوا يقولولي امسح البوست ده”
أكد الفنان شادي خفاجة، أنه لم يتلق أي عروض للمشاركة في أعمال فنية، منذ حوالي 10 أعوام، إذ كان آخر عمل شارك فيه عام 2011، مشددا على رغبته في العودة للتمثيل مرة أخرى، وأنه يحرص على التواصل كل عام مع المخرجين ومساعديهم ليذكرهم بنفسه.
وكتب شادي عبر حسابه الشخصي على موقع "فيسبوك": "أصدقائي الفنانين اخواتي اللي بقوا نجوم ما شاء الله ومبسوط جدا بنجاحهم وتألقهم وفخور بيهم وياما شاركنا بعض اللقمة وشاركنا بعض أحلامنا وأمنياتنا، وشفتهم بفضل الله بيحققوا أحلامهم وفخور وفرحان بيهم جدا لانهم يستاهلوا ده".
اقرأ أيضا| حوار | داليا مصطفى: «قبل الأربعين» أعادني للسينما والورق أول ما جذبني
وتابع "أخوكم بقاله ١٠ سنين كاملين ماشتغلتش في أي عمل فني تحديدا من ٢٠١١، ولا تم ترشيحي من قِبَّل أي حد من أصدقائي، على الرغم من اني كل سنة اتصل ببعض المخرجين ومساعدين الإخراج أصدقائي اللي على تواصل دائم معاهم علشان افكرهم بيا، وبيكون الرد دايما إن أنا ممثل شاطر جدا ومش محتاج تفكرنا بيك احنا فاكرينك دايما، وبنجيب سيرتك بكل خير بس مافيش حاجة مناسبة ليك، مع اني ممثل وأقدر أعمل أي دور يطلب مني سواء صعيدي أو مودرن أو كوميدي أو شعبي أو ظابط أو الخ".
شادي أشار إلى أن عمره 33 عامًا، وهو سن أغلب الممثلين والنجوم حاليًا، موضحًا "أنا مش بلوم حد أنا عارف إنهم بيحبوني وعارف انهم مش هيتأخروا لو شافوا حاجة مناسبة ليا، بس أنا حبيت أفكركم بيا وأفكر أصحابي اللي بيحبوني وفاكرين ليا حاجة كويسة معاهم زمان".
وأضاف "أغلب المقربين ليا هيتصلوا بيا حالا ويقولولي امسح البوست ده وماينفعش تكتب كده، بس أنا شايف اني عاوز أكتب ده من زمان، ومتأكد إن في ناس صحابي كانوا ناسيني ومحتاجين بس حاجة تفكرهم بيا، ويمكن البوست ده لو انتشر ربنا يكرم والاقي فرصة كويسة، و مش عيب أبدا إن الناس تساعد بعض على النجاح والشغل ويا بخت من ربنا جعله سبب لتوزيع أرزاق الناس".
شادي خفاجة هو شقيق الفنان فادي خفاجة والفنان هادي خفاجة، وبدأ الثلاثة العمل بالوسط الفني في مرحلة الطفولة، وقدمهم الفنان محمد صبحي في أكثر من عمل فني.
