«اصحى يا سي أنور نايم وبتشخر».. مسحراتي فنانين زمان يوقظهم بكلمات طريفة
تمر الأعوام على كل منا ولكن لازال صوت المسحراتي يدق القلوب بالفرحة مثلما كان يحدث في سن الطفولة، فمن من الناس لا يحب أن يسمع اصحى يا فلان اصحى يا علان؟
لكن كيف كان نجوم الفن يستقبلون المسحراتي زمان؟
يرصد "الطريق"، في السطور التالية كلمات مسحراتي الفن، حسبما رواها بديع خيري على لسان المسحراتي الممثل عبد الحميد زكي في عدد قديم لمجلة الكواكب بشهر رمضان الكريم. وإليكم الكلمات مثلما سمعها نجوم زمان.
أقرأ ايضًا..
نيللي كريم في حوارها لـ«الطريق»: مسلسل فاتن أمل حربي يطرح أزمة قانون الأحوال الشخصية.. ويجب تغييره
مسحراتي يوسف وهبي
اصحى يا يوسف بيه.. النوم ده كله ليه؟
الصوم ده حق علينا وبكرة نجزى عليه
اصحى وادعي وقول.. يا رب يا موجود
تديم علينا الصحة ونبذل المجهود
وتخلي مسرح مصر يصبح عليه القيمة
وتنصره يا رب على الهبابه السيما
وتندر انك تفضل للفن ده خادم
ووحد الدايم
مسحراتي مديحة يسري
وانتي يا ست مديحة خديها مني نصيحة
تصومي ولا تاكليش إلا يا دوب على الريحة
عشان تحافظي يا بنتي على قوام العيد
وبعد صوم رمضان تتهني يوم العيد
وادعي واطلبلك يومي في كل مساء
انه يخليلك قرة عنيكي وفاء
ولا تبتليش ياختي بقولة اللآيم
ووحدي الدايم
مسحراتي أنور وجدي
وانت يا سي أنور.. نايم وبتشخر
افرك عينك يالا.. وقوم بقى اتسحر
خسيت في كارلسباد.. كيلو في تلت تشهر
لكن صيام رمضان.. ما تخس به أكتر
وبقلبي هدعي واقول.. للخالق للرحمن
ترجع إليك ليلى.. وتبقوا زي زمان
ويرزقك مولود.. والخير يكون تامم
ووحد الدايم
مسحراتي ماجدة
يا مدموازيل ماجدة.. عنيكي ليه ساهده
وسابحة ويا الليل.. وشمعتك قائدة
يكفيكي شر العين.. على الشباب باردة
ويرزقك بعريس.. يكون على قدك
ويبقى طول العمر.. هو سبب سعدك
وتصلي وتصومي.. لربك العالم
ووحدي الدايم
مسحراتي فاتن حمامة
وانتي يا فتونة.. بالظرف معجونة
أنا جاي اصحيكي.. دي الليلة ميمونة
وادي السحور قرب.. وبكرة هتصومي
وربنا يقدر.. على الصيام يومي
وكل يوم هدعي.. في الفرض والسنة
ان شاء الله تنحدفي.. في الآخرة على الجنة
ده بعد عمر طويل.. السعد فيه دايم
ووحدي الدايم
مسحراتي مريم فخر الدين
اما انتي يا مريم.. وربنا الأعلم
في كل شهر كريم.. بتصومي يا مريم
والأسم حتى كمان.. مريم فخر الدين
قومي سحري محمود.. وابقوا سوا صايمين
وان شاء الله يا الهي.. يديم عليكو الستر
وتكملوا صيامكم.. لحد آخر الشهر
ويارب يكفيكم.. عين عذول ظالم
ووحدي الدايم
