محكمة الأسرة 2020| حنان تطلب الخلع: اتحديت أسرتي واستحملت العيشة معاه.. فدخل عليا بضرة
"ضربني على دماغي وجاب ليا ضرة.. وخطف عيالي" بهذة الكلمات بدأت "حنان" صاحبة الـ27 عامًا في دعوى خلع أمام محكمة الأسرة في الظاهر.
وقالت "حنان" في دعواها أمام محكمة الأسرة بالظاهر: "حلمت زى البنات إنى أعمل فرح كبير وألبس فستان الفرح الأبيض، وأتزف لعريسي، وللشخص إللى اختاره قلبي، وعشان كدة اتحديت أسرتي اللي كانوا رافضين جوازي منه، كانوا عاوزين يضمنوا مستقبلي مع واحد وظيفته حكومية، لكني هددتهم بالإنتحار لو بعدوني عنه، فوافقوا على إتمام الزواج".
استحملت ظروف جوزي
وأضافت الزوجة في دعواها أمام محكمة الأسرة: "عشان ظروف جوزي عملنا فرح صغير، ورضيت أعيش معاه فى شقة من غرفتين وحمام فقط، طبعا عشان افتكرت إن الحب هيخلي البيت جنة، وعمري ماعاتبته على حرماني من الدنيا، بنام من غير عشا وأنا مبتسمة عشان ميتحملش فوق طاقته وأن ظروفة على قده، لكن بعد شهرين من الجواز، اتحول الملاك الطيب اللي حاربت أسرتي عشانه، لوحش بيضربني على أتفه الأسباب، عمري ماتخيلت إن الشخص اللي كنت هموت نفسي عشانه هو اللي هيموتني".
وتابعت الزوجة في دعواها أمام محكمة الأسرة : "رغم كل ده ولسه في أول شهور الزواج حاولت اتحمل و أعيش الوجع منه والجروح اللي مالية جسمي كله".
اقرأ أيضًا: بتهمة الاستيلاء على 63 مليون جنيه.. حبس مدير أعمال هيفاء وهبي
ضرب وتعذيب
واستكملت الزوجة في دعواها أمام محكمة الأسرة: "قررت إني مش هرجع بيت أسرتي ثانى وكمان وأنا بشكل دة عشان محدش يشمت فيا، وخلفت أول طفلة منه، ومن بعدها الطفلة التانية، وكانوا هدية ربنا ليا وعوضوني عن مأساتي مع جوزي، وطبعه أصعب من الأول، وكل مرة بكون فيها تحت إيده بيموتني من كتر الضرب، لحد ما أصابني بارتجاج في المخ، وكملت معاه تاني، عشان خوفي من شماتة أسرتي" .
واضافت" حنان" : "بعد كل ده دخل عليا بزوجة أخرى، وكانت المفاجأة بالنسبة ليا، وكانت بتعاملني زي الخدامة لها، وكانت بتعذب عيالي وتحرقهم، وهو يزود المرار ويضربني لو اعترضت ، لحد ما بدأ يسمع كلامها ويتاجر في المواد المخدرة مع اخواتها".
وتابعت الزوجة في دعواها أمام محكمة الأسرة: "دخل البيت وكنت منضفاه ومفيش أي حاجة ناقصة، فتح التلاجة ومكنش فيه مياه باردة، اتعصب ونزل فيا ضرب بالحديدة على دماغي، ومحستش بنفسي غير وانا فى المستشفي وسط أسرتي".
دعوى خلع
وأضافت الزوجة في دعواها أمام محكمة الأسرة: "بعد ما أسرتي شافوني في المستشفى ساعتها طلبوا منه يطلقنى بعد ما الدكتور قال إن ممكن يصيبني العمى والشلل قريب بسبب الضرب علي دماغي، بس هو رفض يطلقني، فرفعوا ضده دعوى خلع، فانتقم وخطف أطفالي مني ولحد دلوقتي مش عارفة أشوفهم".
وقالت " حنان" في دعواها أمام محكمة الأسرة: "كل اللي شوفته ده اتحملته كان عشان خاطرأطفالي وخلاص هتعمي بسبب حبي ليهم وليه، عارفة إنه هيحرمني منهم عشان كده كنت خايفة أطلق، مش عاوزة حاجة غيرهم رجعولى عيالي".
