الفيروس وحش أوي.. زوج داليا البحيري يكشف تطورات حالته الصحية ويوجه نصائح للجمهور

طمأن حسن سامي زوج الفنانة داليا البحيري، الجمهور على حالته الصحية، وكشف اليوم السبت، عن معاناته مع فيروس كورونا المستجد، كما وجه بعض النصائح للمواطنين.

وكتب حسن سامي، عبر حسابه الخاص بموقع التواصل الاجتماعي "فيس بوك"، موضحًا أنه من المقرر عمل مسحة بعد يوم للتأكد من تمام الشفاء: "الحق أقول الكلمتين اللي عندي قبل ما تنتشروا في شوارع المحروسة.. أولًا اطمن كل أحبابي وأصحابي إني في نعمة وفضل من ربنا، ومنتظر فرجه قريبًا.. بكرة أكمل 14 يوم وأعمل المسحة بعد بكرة إن شاء الله".

وأضاف سامي: "ثانيًا ودة الأهم، اللي كان محافظ على نفسه كان بيعمل كدة لأنه خايف من الكورونا مش علشان في حظر، يعني عودة الحياة التجارية إلى طبيعتها مالوش علاقة إنك تستمر تخاف على نفسك، وكمان أكتر من الأول".

وأوضح : "أنا مريت بالتجربة وأحب أقولكم إن الفيروس ده وحش قوي وأوحش من مرات كتير مرضت فيها، لأنه ببساطة بيجبر الواحد ينعزل عن العالم الخارجي ويعني تقعد على الأقل أسبوعين لوحدك تمامًا، يعني مش من حق أي حد مهما كان قريب منك انه حتى يديلك الحضن والحنية والاهتمام اللي أي مريض بياخدهم، كله بالتليفون".

اقرأ أيضًا: ”فرحانة قوي قوي”.. ابنة الفنانة رجاء الجداوي تعبر عن سعادتها

واستكمل: "مش دلع والله بس بجد فيروس بيتعب الأعصاب جدًا، ومحتاج روح معنوية قوية علشان تتغلب عليه.. ونصيحة بقى من مجرب، لو سمحتم بما إن الكل هينتشر، يبقي اللي يحس بأي عرض ولو ارتفاع بسيط في الحرارة أو وجع خفيف في الحلق، ولا حتى كحة خفيفة لا تذكر.. يا ريت يلتزم العزل فورا، ويبدأ إجراءات التأكد، تحاليل وإشاعة على الصدر، لأن السيطرة بدري بتخلي المواضيع سهلة بإذن الله وبتحمي الناس اللي مخالطة لك".

واختتم: "ربنا يحمي الجميع ويسترها على كل حبايبكم.. اللي عاوز يعرف أي تفاصيل يبعت يسألني وأنا تحت أمره".