علي لسان أصحابها.. حقائق جديدة عن ملحمة البرث والأسطورة منسي (فيديو)
تبقي الوقائع عظيمة ومعبرة حينما تروي علي ألسنة أصحابها، لتضفي عليها الحقيقة والدقة، وشاهد علي ماحدث، وتبقي موقعة كمين البرث بسيناء الأكثر عظمة وبطولة في تفاصيلها.
الملازم أول بطل محمد طلعت السباعي يروي في شهادته علي ماجري في ملحمة البرث" كنت في اليوم ده نباطشية أنا وحسانين وكنا بنبدل الخدمة الساعة الرابعة صباحا، وأنا نازل علي سلم الدور الثاني سمعت العسكري خالد اللي معاه الجهاز بيقول حرس سلاح".
وأضاف السباعي"مع الانفجار أنا طرت للسقف ووقعت علي الأرض تاني، وبعد خمس ثواني فوقت وسحبت سلاحي ولقيت المقدم منسي صاحي والنقيب شبراوي موجود وفيه عساكر صاحية، وسمعت المقدم منسي بيقول العيال دي مش هتخش الكمين يارجالة، ومل واحد سلاحه في ايده ولأخر طلقة، وطلع المقدم منسي جاب السلاح وطلع علي السطح وقال مش عايز حد يجي ورايا".
وأشار السباعي" بعد فترة من التعامل جالي علي اللاسلكي صوت خالد مغربي بيقولي أثبت ياسباعي احنا داخلين عليك".
الجندي البطل محمد علي علي تايسون قال "خالد جي وقالنا الساعة بدرية والنهاردة الجمعة والساعة دي بتاعتهم، كل واحد يلبس الخوذة ويشد سلاحه ويقف في مكانه صح".
وأضاف تايسون في شهادته" سمعت الشاويش الفرارجي بيقول أثبت أثبت وبدأنا نتعامل بالرشاش، وبعدين حصل الانفجار وطرت فوق ووقعت علي خدي ومكنتش حاسس بحاجة".
واستطرد الجندي البطل" لقيت المقدم منسي طلع علي السطح وبصلهم، ولسه بسحب الكلاش لقيت دانة أى بي جي ضربت عليا".
الجندي بطل أحمد محمد فراج، أضاف في روايته عن ملحمة البرث" سمعت حرس سلاح وبدأنا نردد الكلمة عشان توصل لكل زمايلنا".
و تابع " الكمين اتهد بسبب الانفجار وكان مشهد صعب".
الجندي البطل أحمد عزت قال" المقدم المنسي الله يرحمه كان مدربنا علي كلمة حرس سلاح أكتر من مائة مرة، وكل واحد عارف موقعه وعارف مكانه، وعارف بيتحرك ازاي السلاح بيبقي تحت المخدة ".
الجندي البطل باسل رفعت يقول" كنت نايم وسمعت حرس سلاح وأنا سلاحي كان تحت المخدة، ولقيت زميلي بينط السلم علشان كان فيه تعامل، وتتحرك العربيات اللي بتحمي الكمين وعليها رشاش برج وسواق".
الجندي بطل فتحي عبد الرحمن" لقينا العربية نص نقل دخلت وفيها التكفيري بيبص ويضحك واحنا بدأنا نضرب عليها نار لحد ما اتفجرت".
الجندي بطل خالد علي موسي ابن حمدون" بلغت على الجهاز فيه عربية دخلت المدق وضربت عليها وبعد كده، حصل علينا تعامل".
واستكمل"طلع المقدم يتعامل معاهم من فوق، واحنا كنا نتعامل معاهم علي السلم، ومعناهم، من دخول الكمين ، وكان العسكري علي علي يطلع من برج الحمام ويضرب، وكان أحمد نجم معانا بردو وخد طلقة واستشهد علي السلم، ورجعت لقيت صندوق القنابل والكلام السباعي قال لي فعلهالي كلها وكان يضرب عليهم من فوق عشان محدش يطلع الكمين".
