جريدة الطريق

رئيس مجلس الإدارة مدحت بركات

  • WE
السبت 11 يوليو 2020 11:35 مـ 20 ذو القعدة 1441هـ
المقالات

دوخيني يا لمونة

السيد محمد راشد
السيد محمد راشد

مين كان يصدق إن كيلو الليمون يوصل لـ40 جنيه بسبب زيادة الطلب عليه، لأنه يحتوي على فيتامين سى ويقوي المناعة وعلاج ضد فيروس كورونا؟

شجرة الليمون رخيصة جدا وتزرع فى كل أنواع الأرض رملية أو طينية أو مالحة.

لماذا لاتزرع فى الشوارع وأمام البيوت وعلى حافة الترع والأنهار؟

لو تم حصر الأماكن التى يمكن أن تزرع بالليمون فى القرى وفى شوارع مصر الواسعة، هنزرع وننتج ليمون كتير ويمكن نصدره.

ليه منزرعش الليمون بدل شجر الفيكس المنتشر فى شوارع مصر ومستهلك للمياه ويدمر التربه وليس له فائدة تذكر.

نبدا القصة من الأول.

محمد على باشا لما حكم مصر وحفر الترع والرياحات من أجل توصيل مياه النيل الى كل شبر فى مصر لاحظ الأتي:

كل فلاح كان بيزرع شجرة سنط على راس غيطه، وشجر السنط ليس له ظل ويحوى نوع مرعب من الدود.

فسال فلاح ليه بتزرع السنط وليس له ظل ويحوى الدود؟

الفلاح قال مش عاوز أي حد يقرب من حقلي وهذه الشجرة بمثابة حارس فى عدم وجودى.

محمد على كان من البلقان فى وسط أوروبا، و فكر وقال:

لماذا لا يتم نقل شجرة التوت من هنا إلى مصر؟

وتم نقل شجرة التوت إلى مصر ونجحت نجاح باهر، وتمت زراعتها على حافة الترع والأنهار وفوق رأس الحقول، وشجرة التوت مثمرة لها ظل وارف، وتنتج ثمار التوت، وعلى أوراقها يتم تربية دود الحرير، ونجحت فى مصر وأحبها المصريين وتم زراعتها فى كل مكان.

ومع البدء فى تعمير المناطق الصحراوية، وانشاء مدن جديدة، تم زراعتها بشجر الفيكس وهو شجر مستهلك للمياه مدمر للتربه غير منتج.

وانتشر فى كل مكان أمام البيوت وفي أفنية المنازل وعلى حافة الترع والأنهار وأصبح سببا رئيسا فى استهلاك المياه.

كنت بستعرض مع أخي تاريخ شجرة الفيكس فى مصر فقالي:

لما اشتريت منزل فى التجمع وفيه مساحة فاضية كمتنفس، البواب قالى هنزرع إيه؟

ذهبنا الى المشتل لشراء شجر الفيكس زى الكل مابيعمل، لاقيناها غالية جدا بسبب الطلب المتزايد عليها.

وأرخص شجر هو الليمون والزيتون، فاشتر ينا وزرعناه فى كل مكان، وأمام المزل فى جزيرة الشارع، وتوليناه بالرعاية، ومع مرور الوقت الشجر كبر وأصبح مثمر، وكل الناس بقت تيجى تطلب الليمون.

كتبنا لافتة جنب الشجر مسموح بقطف الليمون والزيتون بدل مايقع ويبوظ.

افتكرت أيام زمان لما سافرت أوروبا وشفت شجر التفاح فى كل مكان زي التوت عندنا، سألت واحد قالى ثمرة التفاح هى ليمونة البلاد الباردة، فعرفت أهمية التفاح والليمون.

لازم نغير العادات الزراعية الخاطئة وننشر الليمون فى كل مكان .

لما عرفت أهمية الليمون للبلاد الحارة، والتفاح للبلاد الباردة، أول حاجة عملتها قطعت شجرة الفيكس وزرعت ثلاث شجرات ليمون.

الشجر بيجيب محصول صيف وشتا وكل اللى محتاج ليمون بياخد منه بدون مقابل.

صدقت المعلومات إللي عرفتها عن شجرة الليمون، إللي بتقول شجرة الليمون فى منطقة تقضى على الأمراض المستقرة فيها.

لو حد يعمل حملة توعية بأهمية شجرة الليمون، ليتم زراعتها فى كل مكان على شط الترع والأنهار والشوارع الواسعة وأفنية المنازل وعلى الطرقات وأمام المحلات.

شجرة الليمون شجرة مهمة ويجب زراعتها مكان شجر الفيكس، وهو وباء انتشر فى مصر زى ورد النيل.

 

 

دوخيني يا لمونة مقالات الطريق شجر اللمون مقال اليوم شجر الفيكس شجر التفاح مقالات الكتاب مقالات الرأي