ردود نارية من تامر حسني على حلا شيحة: ”أشيل مشاهدك وأغني لماجد الكداوني؟”
استنكر الفنان تامر حسني هجوم الفنانة حلا شيحة عليه واتهامه بعدم احترام رغبته لها بحذف بعض المشاهد في كليب أغنية "بحبك" التي طرحها الأخير أمس عبر "يوتيوب"، مؤكدًا أنه لم يعدها بعدن طرح الكليب.
وكتب تامر حسني في منشوره عبر "فيس بوك" "نهاركم جميل يا أغلى الناس الحقيقة عمري ما بتخيل إني أدخل في نقاش بالشكل دا مع زميل بحترمه وكان في بينا كل خير للتوضيح بما إنك يا حلا كتبتي بوست وأشركتي الجمهور الكريم معانا بدال ما كنتي تكلميني شخصيًا و نتناقش بيني وبينك ، فا أنا مضطر أرد هنا برضه"
ونفى تامر حسني وعده لحلا شحية قائلًا:" أولاً أنا عمري ما وعدتك إن الكليب مش هينزل دا محصلش اصلاً يا حلا مش أنا خالص اللي أوعد و أخلف….. الحقيقة اني إحترمت كلامي معاكي و وعدتك أشيل مشاهد تانية طلبتيها وشيلتها بالفعل وشكرتيني عليها ولو حابة تفتكري المشاهد اللي اتشالت بعد إذنك روحي شوفيها في المونتاچ عند الأستاذ عمرو عاكف او كلميه يبعتهالك كلها موجودة".
واستنكر من هجومها عليه بعد طرح الكليب رغم أن الفيلم طرح قبل 3 أسابيع وبداخله الكليب أيضًا، إذ كتب:" وبعدين الفيلم بقاله ٣ أسابيع في السينمات والكليب موجود جوه الفيلم هو بالنسبة لك الحرام إننا ننزل الكليب على اليوتيوب بس !! إنما الكليب يتشاف جوه السينمات عادي ؟؟؟؟ منطق غريب فعلاً يا حلا ، وبعدين هو مش أنتي اللي مضيتي عقد وتقاضيتي عليه مبلغ كبير عشان الدور دا بعينه".
واستكمل: "هو مش إنتي اللي صورتيه ومثلتيه بنفسك وبمنتهى الرضا ولا حد أجبرك ؟!! و للتوضيح للجمهور الكريم أنا والمخرجة سارة وفيق بعتنالك وكنا بنتحايل عليكي تيجي تشوفي شغلك قبل إصدار الفيلم عشان لو عندك أي ملحوظة تقوليها، ماكنتيش بتردي علينا وتليفوناتك كلها كانت بتقفل في وشنا، إنتي للأسف يا حلا متعاملتيش صح مع الموقف كان لازم تهتمي بأمرك أكتر من كدا".
واستطرد: "ولو كان ليكي أي طلب تاني كنت هعمله بكل حب إنما إنتي فجأه أختفيتي ومكملتيش تركيب صوتك في الفيلم ولا جيتي تتصوري عشان آفيش الفيلم أصلًا ومخليتيناش نعرف نعمل آفيش مجمع !!! وبقيتي تقفلي تليفوناتك وتكنسلي علينا كلنا وبعدين أي فيلم بيبقى ليه خطة مسبقة في الدعاية وإنتي عارفاها كويس ووافقتي عليها ودا كليب رومانسي يعني معقول كنتي عايزة المنتج يشيل كل مشاهدك اللي صورتيها من الكليب يطلعني بغني وبقول الكلام الرومانسي دا للأستاذ ماجد الكدواني مثلاً، هو دا يُعقل ؟؟!".
اقرأ أيضًا: تامر حسني عن تبرؤ حلا شيحة من مشاهدها: ”انتي إللي صورتيها ومحدش أجبرك”
وانهى حديثه قائلًا :"أنا زعلان منك جداً يا حلا على مفردات البوست بتاعك الغير موفقه و مستحيل هرد بطريقتك اللي فيها تجريح و اتهامات باطله ليا إحتراماً لحجات كتير يمكن فايتاكي بس مش هتفوتني وعلى فكرة انا واثق انك عارفه اني مستاهلش منك كدا وهكتفي بالتوضيح دا وربنا يهدي الجميع ويكتبلك كل الخير اللهم آمين".
