الأسواق الشعبية
الإنسان كائن اجتماعى بطبعه يعيش فى جماعات ولا يحب العزلة كما فعل روبنز كروزو الذى عزل نفسه وأحب ان يعيش مع نفسه فى عزلة، فلم يستطع. وكل تجمع بشرى يحمى بعضه ويستفيد بعدة مزايا، منها القطيع فى الحيوانات يحمى بعضه ويصعب مهاجمته من قبل الحيوانات المفترسة، كذلك البشر عندما يعيش فى تجمع يصعب على الأعداء مهاجمته أو اختراقه، أما من يعزل نفسه فلا يستفيد بهذه الميزة ويعرض نفسه للخطر (روبز كروزو). عندما يكون هناك تجمع بشرى تنشأ فكرة تبادل فوائض الإنتاج. ازاى؟ انا بنتج حبوب والآخر صياد والآخر ينتج فاكهة، لو كل واحد بينتج على أد استهلاكه مفيش مشكلة.
المشكلة تنشأ عند زيادة الإنتاج. وعملو ايه فى الانتاج الزيادة؟ طبعا مكنش فيه وسائل تخزين، فكان كل واحد بيرمى البضاعة التالفة امام مكان إقامته، وايه اللى حصل؟.
فيه ناس بقت تمر على السلع التالفة وتفتش فيها لعل وعسى أن يكون من بينها سلعة صالحة للاستهلاك، وفعلا كانوت يجدون سلعا صالحة ومتنوعة.
المنتج كان عنده سلعة واحدة، دول كان بيكون عندهم سلع متنوعة، ومع تطور البشرية واتساع هذه المجتمعات، لماذا لا نعرض فائض الانتاج أمام المنزل، لعل وعسى حد يستفيد بيه؟ وفعلا بقى اللى عنده فائض حبوب يعطيها للى عنده فائض اسماك، ودى كانت بداية المقايضة السلعية.
ونجحت الفكرة والكل استفاد من فوائض الإنتاج بدل ما كان بيرميها. ومع تطور المجتمعات وزيادة عدد السكان بدأ الكل فى عرض فوائض الإنتاج فى الاماكن المتسعة بدل ما يسد الشارع اللى كان ضيق بغرض الحماية.
وهى دى كانت بداية الأسواق الشعبية غير المنظمة العشوائية. إيه ميزة الأسواق دى؟ اللى بيبيع فيها مش تاجر محترف، دا منتج وعاوز يخلص من السلعة وخلاص.
زى فلاح معاه شوية ملوخية مش هيبيع بالجرام زى التاجر ما بيعمل، هيبيع بالبركة والمستفيد هنا هو المشترى. لو صياد معاه سمك بيبعهم بالشروة، المشترى هو المستفيد، لان البائع هنا مش محترف. يبقى أنا من مصلحتى اشترى من الأسواق دى اللى كل حاجة فيها رخيصة عن الأسواق المنظمة، والبيع فيها بالبركة مش بالكيلو.
شوية شوية التاجر المحترف دخل هذه الاسواق ليستفيد من القوة الشرائية التى توجد بها.
يعنى لما الأسواق الشعبيةه اتقفلت فيه ناس كتير هيضروا. طبعا فوائض الانتاج اللى عند الفلاح زى الجبنة والزبدة والطيور والحبوب هتروح فين؟ والسوق الشعبى هو المكان الوحيد لتصريفها وتلاقى مهن كتيرة بتخدم التجار زى عربات الكارو والتروسيكلات والتكاتك والكل بيسترزق، وآخر النهار ينفض السوق وقد ربح من ربح وخسر من خسر. السوبر ماركت بيكون فيه كل السلع بس سعرها أضعاف السلع اللى بتتباع فى الأسواق الشعبية، وبتوع الريف اللى بيسكنوا المدن عارفين كده فبيجيبوا طلبات منزلهم من قراهم بالنص وبيوفروا كتير.
